«Бұл – жақсы жұмыстың көрсеткіші»: «Қайраттың» экс-сұрмергені – клубтың еурокубоктағы жетістігі туралы

«Қайраттың» бұрынғы шабуылшысы Адеринсола Эсеола ASnews.kz басылымына берген сұхбатында алматылық ұжымның Чемпиондар лигасының үшінші іріктеу кезеңіне шығуына қатысты пікір білдірді.

«Алматыға демалуға, ойынды көріп, жігіттерді қолдауға келдім. Орталық стадионға қайта оралу, осы атмосфераны сезіну, әрі әрине, жеңіске жету өте жағымды болды.

Жігіттер, жарайсыңдар. Бұл өте ауыр матч болды. Ойынды пенальти сериясына дейін жеткізді, негізі оған дейін апармау керек еді, бірақ не десек те – бұл футбол. Барлығының осылай аяқталғаны әрі сәтті болғаны жақсы болды. Жеңімпаздарды сынауға болмайды деген сөз бар ғой. Оларда бірнеше күн демалыс болатынын, күш жинап, келесі ойынға дайындалуға уақыт бар екенін білемін».

«Қайрат Боранбаев әрқашан осыны қалайтын»

«Қайраттың» екінші жыл қатарынан еурокубоктардың негізгі кезеңінде ойнайтыны – керемет нәтиже. Қайрат Боранбаев әрқашан осыны қалайтын, біз де әрдайым осыған жету үшін ойнадық. Тек біздің жолымыз әрқашан да бола бермейтін (күледі).

Қазіргі жігіттердің қолынан келіп жатыр, Құдайға шүкір, олар осы мақсаттарына сенімді бара жатыр. Олардың тамаша бапкері, керемет командасы және жақсы селекциясы бар. Бәрі сәтті өрістеуде. Бірақ бұл тіпті сәттілік те емес – бұл «Қайраттағы» дұрыс атқарылған жұмыстың көрсеткіші».

«Бұл ойыншылардың бала кезін білемін»

«Қазіргі құрамдағы жігіттердің көбін білемін, өйткені мен «Қайратта» ойнап жүргенде олар өте жас еді. Қазір олар негізгі командада жүр, ал ол кезде бізге бала болып келіп, бірінші командамен бірге жаттығатын. «Қайратқа» келесі кезеңде сәттілік тілеймін», – деді украиналық бұрынғы шабуылшы.

Еске сала кетейік, «Қайрат» негізгі уақытта 1:0 есебімен жеңіске жеткен соң, Кипрдің «Омониясын» пенальти сериясында (6:5) ұтып, Чемпиондар лигасының үшінші іріктеу кезеңіне шықты.

Украиналық шабуылшы Адеринсола Эсеола алматылық клубта 2018–2021 жылдар аралығында өнер көрсетіп, оның сапында Қазақстан чемпионы атанған болатын. Эсеола «Қайрат» жейдесінде жалпы 84 матч өткізіп, 38 гол соқты және 9 нәтижелі пас берді.

«Алматыдағы сиқыр қайталанды»: «Қайраттың» қорғаушысы «Омонияны» жеңу және Түркістандағы матч туралы