«Қайраттың» экс-қорғаушысы «Олимпиямен» болатын матч туралы: алматылықтар келесі кезеңге шығады

Алматылық «Қайраттың» словакиялық экс-футболшысы Лукаш Тесак BorodAbata.kz сайтына берген сұхбатында Чемпиондар лигасының іріктеу кезеңінде «Олимпиямен» өткен алғашқы ойыннан алған әсерімен бөлісіп, өзінің бұрынғы командасына қолдау білдірді.

«Мен болып жатқан барлық оқиғалардан хабардармын, команданы бақылап отырамын және бірінші матч 1:1 есебімен аяқталғанын білемін. «Қайраттың» голынан кейін қарсыластың тез гол соққаны өкінішті-ақ.

Бірақ, жалпы алғанда, бастамасы жаман емес, барлығы Алматыда шешіледі. Ең бастысы, команда келесі кезеңге шығады деп сенемін! Және, әрине, трибунада жанкүйерлердің көп болары анық», - деді Тесак.

Экс-футболшы Қазақстанда өткізген жылдарын да еске алды:

«Қайраттағы» кездерімнен тек жақсы естеліктер қалды. Барлығына сәлем жолдап, бар жақсылықты тілеймін!» - деді Лукас.

2016 жылы Лукас Тесак алматылық команда сапында алты ай ойнап, 21 матчта бір гол соғып, үш нәтижелі пас берді. «Қайрат» сапындағы алғашқы ресми ойынында Тесак командамен бірге Қазақстан Суперкубогын жеңіп алды. 40 жастағы қорғаушы қазір Словакияның «Сокол» клубында өнер көрсетеді.