Қазақстандық төреші алғаш рет Чемпиондар лигасында VAR бөлмесінде жұмыс істейді

Жаңа еурокубоктық маусымның басталуымен қазақстандық реферилер УЕФА аясындағы додаларға халықаралық тағайындаулар алды, деп хабарлайды ASnews.kz.

Отандық төрешілер бригадасы УЕФА Чемпиондар лигасының алғашқы іріктеу кезеңі аясындағы молдовалық «Петрокуб» пен албаниялық «Эгнатия» арасындағы матчқа қызмет етеді. Кездесу 8 шілде күні Кишиневте өтеді.

Ойынның бас төрешісі болып Саят Қарабаев бекітілді. Оған сызық бойында ассистенттер Дмитрий Белоградов пен Юрий Тихонюк көмектеседі, ал резервтік төреші міндеті Данил Гордаға жүктелді. Матчтың басты тарихи оқиғасы – Айдын Тасыбаевтың тағайындалуы болды. Ол УЕФА тарапынан Чемпиондар лигасының матчына бейнеарбитр (VAR) ретінде бекітілген алғашқы қазақстандық рефери атанды.

ҚФФ Төрелік ету және инспекциялау департаментінің директоры Нуну Каштру да УЕФА-дан шақырту алды. Ол Уэльсте өтетін U-19 жасөспірімдер арасындағы Еуропа чемпионатында төрешілер нұсқаушыларының тізіміне енді.

Еске сала кетейік, 3 шілдеде қазақстандық төреші Татьяна Сорокопудова әйелдер арасындағы U-19 Еуропа чемпионатының финалдық кезеңіндегі өзінің екінші матчында төрелік етті. Ол Польша және Босния және Герцеговина құрамалары арасындағы кездесуде бас төреші болды.