«Қайрат» капитаны – «Арсеналмен» болған матч жайлы: үлкен тарих жасадық

Алматылық «Қайраттың» капитаны Александр Мартынович ASnews.kz сайтына берген сұхбатында «Арсенамен» болған ойынды қорытындылады. Тәжірибелі қорғаушы ойынның алғашқы минуттарына дайын болмауына тонус пен күрделі логистика әсер еткенін мойындады.

«Қарқын өте жоғары болды. Алғашқы 20 минутта ойынға кіру қиынға соқты. Қазіргі физикалық жағдайымызды ескерсек, ойын жылдамдағы бізге ауыр тиді.

Біз «Брюггемен» матчтан кейін Алматыға оралдық: ол жақта қар, суық, жаттығу жасауға мүмкіндік болмады. Кейін бір тәулік бойы жолда болдық. Елге келген соң ұзақ уақыт жаттығу жасамадық. Сондықтан оңай болған жоқ», – деп түсіндірді Мартынович.

Жеңіліске қарамастан, капитан еурокубок маусымына оң баға берді.

«Атмосфера мен жанкүйерлердің қолдауы туралы айтсам – тіпті «Эмирейтсте» де бізді қолдаған фанаттардың дауысын естідік. Атмосфера керемет болды, бұл жақсы эмоция сыйлады.

Рафаэль Радикович (Уразбахтин – ред.) киім ауыстыратын бөлмеде қорытынды жасап, барлығына алғыс айтты. Қалай болғанда да, біз үлкен тарих жасадық – «Қайрат» алғаш рет Чемпиондар лигасының негізгі кезеңіне шықты», – деді команда көшбасшысы.

Мартынович сондай-ақ қорғаныс шебіндегі әріптесі Егор Сорокиннің кетуі мен жас талант Дастан Сәтпаевтың жоқтығына қатысты пікір білдірді.

«Әрине, мықты ойыншылардан айырылу қиынға соғады. Егорға тек сәттілік тілейміз, футболшы ретінде өсе берсін, жаңа белестерге жетсін дейміз.

Ал Сәтпаевтың жоқтығына келсек: Дастан небәрі 17 жаста, бірақ бізге оның жылдамдығы мен жеке шеберлігі жетіспей тұр. Ол тезірек қатарға қосылады деп үміттенеміз».

«Осындай алып клубтарға қарсы ойнағанда шабуылда прогресс жасау қиын, өйткені көбіне қорғаныста ойнайсың. Бірақ бұл жас ойыншыларға сенімділік береді. Келесі маусымда команда әлдеқайда мықты болады деп ойлаймын», – деп түйіндеді Мартынович.

«Эмирейтс» стадионында өткен матч 3:2 есебімен «Арсеналдың» пайдасына аяқталды. Осылайша, «Қайрат» Чемпиондар лигасындағы жорығын аяқтады. Бұған дейін қорғаушы Егор Сорокин алматылық клубтан кететінін ресми түрде мәлімдеген болатын.