«Қайрат» қорғаушысы – «Арсеналмен» болған матч жайлы: лайықты түрде ойнадық

«Қайрат» клубының қорғаушысы Егор Сорокин «Арсеналға» қарсы өткен Чемпиондар лигасының матчынан кейін ASnews.kz сайтына берген сұхбатында команданың ойынына баға берді.

«Жеңіске жете алмағанымызға қынжыламыз. Бірақ барлық жағдайды ескерсек – маусымның соңы, ұзақ үзіліс, қарсыластың деңгейі – біз лайықты түрде ойнадық деп ойлаймын. «Қайрат» әзірге мұндай топ-клубтармен көп ойнаған жоқ.

Біз соңына дейін күрестік, барымызды салдық. Ойын біз қалағандай болмаған шығар, бірақ қарсы тұрып, соққыға төтеп бергенімізге қуаныштымыз. Құдай қаласа, болашақта «Қайрат» Еуропада бәсекеге қабілетті командаға айналады», – деді қорғаушы.

Сорокин Лондонға арнайы келген жанкүйерлерге де алғыс айтты.

«Әрине, жанкүйерлердің үміті зор болды. Бұл – біздің алғашқы тәжірибеміз, сондықтан оларға нағыз мереке сыйлай алғанымызға қуаныштымыз. Жалпы алғанда, бұл Қазақстан футболы үшін үлкен серпін болды.

Бізді қолдап келген барлық жанкүйерге үлкен рахмет. Автобустан адамдардың қазақ туын ұстап, бізге қол бұлғап тұрғанын көрдік. Атмосфера керемет болды. Мұндай грандтарға қарсы Чемпиондар лигасында ойнау – әрбір футболшының арманы. Біз бұл деңгейге өз еңбегімізбен жеттік», – деп түйіндеді ол.

Чемпиондар лигасының сегізінші тур ойынында «Арсенал» 3:2 есебімен жеңіске жетті. Лондондық клуб сапында Виктор Дьокереш (2-минут), Кай Хаверц (16) және Габриэл Мартинелли (38) гол соқты. Ал «Қайрат» құрамында Жоржинью 7-минутта пенальтиді сәтті пайдаланса, қосымша уақытта (90+4) Рикардиньо мергендік танытты.

«Арсенал» 24 ұпаймен турнирлік кестеде бірінші орынды иеленді. Ал «Қайрат» бар болғаны бір ұпай жинап, соңғы орынмен турнирдегі жорығын аяқтады.

Матчтан кейін Сорокин алматылық клубтан кететінін растады.