«Қайрат» жартылай қорғаушысы «Эмирейтстегі» ойынға баға берді: нәтиже жаман емес

Алматылық «Қайраттың» тіреуші жартылай қорғаушысы Дамир Қасабулат ASnews.kz сайтына берген сұхбатында Лондонда өткен «Арсеналға» қарсы ойыннан кейін пікір білдірді.

«Ойын қиын өтті, оны бәрі көрді. Дегенмен, нәтиже жаман емес деп айта аламын.

Бізге ойын тонусы жетіспеді. Өйткені чемпионаттың аяқталғанына біраз уақыт өтті, ал қаңтардағы оқу-жаттығу жиындарында ол тонусты толығымен жинап үлгермедік», – деді Қасабулат.

Сондай-ақ, жартылай қорғаушы стадиондағы қолдау мен команданың дамуы жайлы айтты.

«Жанкүйерлерге келсек, әрине, біз оларды естідік. Бәріне көптен-көп рақмет!

Жігіттердің бәрі өсу үстінде. Осындай ойындар арқылы тәжірибе жинаймыз. Бұйыртса, болашақта бұдан да жақсырақ ойнаймыз», – деп қорытындылады футболшы.

Еске салайық, Чемпиондар лигасының жалпы кезеңінің соңғы турында «Қайрат» қонақта «Арсеналға» 2:3 есебімен есе жіберді. Осылайша, алматылық клуб еурокубок маусымын аяқтады.