Темірлан Анарбеков: «Арсеналға» қарсы матчта алаңға жайдан-жай шықпаймыз

Алматылық «Қайраттың» қақпашысы Темірлан Анарбеков Лондонда өткен баспасөз мәслихатында стадионнан алған әсері мен алдағы матчқа дайындығы туралы айтты, деп хабарлайды ASnews.kz.

«Бала кезімнен АПЛ командаларының ойындарын көріп өстім. Мұндағы эмоция мүлдем бөлек. Алла қаласа, ойын кезінде қандай сезімде болатынымызды көреміз.

Біз Чемпиондар лигасында мықты қарсыластарға қарсы біраз матч өткіздік. Алаңға жайдан-жай шықпаймыз, жүз пайыз дайын боламыз», – деді Анарбеков.

Сондай-ақ қақпашы өз көрсеткіштері бойынша Чемпиондар лигасындағы үздік 20 ойыншының қатарына кіргенін атап өтті:

«Чемпиондар лигасының топ-20 ойыншысының қатарына ену мен үшін үлкен қысым, кедергі болмайды. Біз күн сайын бар күшімізді салып жүрміз. Осы үшін командаластарыма алғыс айтқым келеді».

«Арсенал» мен «Қайрат» арасындағы Чемпиондар лигасының соңғы тур ойыны Лондондағы «Эмирейтс» стадионында өтеді. Матч қаңтардың 28-нен 29-на қараған түні Қазақстан уақытымен 01:00-де басталады.