«Арсеналдың» экс-футболшысы: «Олимпиакосқа» «Қайратқа» қарсы ойнау қиын болады

Грекиялық ОФИ клубының қорғаушысы Илиас Хадзитеодоридис ASnews.kz сайтына берген сұхбатында Чемпиондар лигасының алтыншы турында «Қайрат» пен «Олимпиакос» арасындағы матч туралы пікір білдірді.

«Бұл қиын ойын болады, себебі «Қайрат» та, «Олимпиакос» та жақсы командалар. Бізді керемет ойын күтіп тұр, кім көбірек қаласа, сол жеңіске жетеді», – деді Хадзитеодоридис.

Чемпиондар лигасының алтыншы турындағы матч 9 желтоқсанда «Астана Аренада» өтеді. Алматылықтар турнир кестесінде 35-ші, ал қонақтар 33-ші орында тұр.

Хадзитеодоридис биылғы маусымда ОФИ сапында 11 ойын өткізді. 28 жастағы «Арсенал» академиясының түлегі бұған дейін «Брентфорд», «Панатинаикос» және «Панетоликос» клубтарында ойнаған.

1990 жылдарға дейін Илиастың ата-анасы Шымкентте тұрған. ASnews.kz сайтының хабарлауынша, футболшы Қазақстан құрамасында ойнауға дайын, бірақ қазіргі төлқұжатынан бас тартқысы келмей отыр.