Анарбеков – «Интерге» қарсы ойыннан кейін: «Қайраттың» даусын «Сан-Сирода» есту ерекше болды

«Қайраттың» қақпашысы Темірлан Анарбеков Чемпиондар лигасының төртінші турында өткен «Интерге» қарсы матчтан кейін ASnews.kz тілшісіне әсерімен бөлісті.

«Жеңіске жеткіміз келді, бірақ бұйырмады. Барлық эмоцияны бердік, барлығымыз күрестік. Қарсыласты өзіңіз білесіз – «Интер». Қиын болады деп ойладық, бірақ оларға қарсы ойнауға болатынын көрдік. Көп гол жіберіп қоймауды ойладым, ал бәрі маған көмектесті. Қобалжу кез келген ойын алдында бар. Бірінші таймда гол жіберіп алған соң, эмоцияларымыз орнына түсті – кейін оңайырақ болды. Бірге-бір шыққан сәтте, аяқпен тіреген сейв – осы ойындағы ең ауырларының бірі болды. Мартыновичтың болмауы қатты сезілмеді, өйткені Широбоков жақсы ойнады, талпынысын көрсетті.

Жанкүйерлердің даусын анық естідік, бірінші таймда олар артымызда отырды. «Қайраттың» даусын «Сан-Сирода» есту – ерекше сезім екен. Біз ұпай алуға тырыстық, «Интерге» қарсы да сендік, бірақ бұйырмады. Алда ұлттық құраманың ойындары бар, сондықтан қазір демалып, келесі матчтарға дайындаламыз.

Ян Зоммермен сөйлестім, оның жейдесін ойыннан кейін барып сұрадым», – деді Анарбеков.

Чемпиондар лигасының төртінші турында «Қайрат» Миланда «Интерге» 1:2 есебімен жол берді.

Қайрат сапынан Офри Арад (55’) гол соқты, ал италиялық клубтан Лаутаро Мартинес (45’) пен Карлос Аугусто (67’) көзге түсті.

Төрт турдан кейін «Қайраттың» еншісінде – бір ұпай, ал «Интердің» қоржынында – 12 ұпай. Алматылықтар келесі ойынын 26 қарашада сырт алаңда «Копенгагенге» қарсы өткізеді.

Бұған дейін Дамир Қасабулат қарсыластың деңгейін бағалады.