Смақов – «Интер»–«Қайрат» матчы жайлы: мұндай ойында мінез бен сәттілік маңызды

Қазақстан құрамасының бұрынғы капитаны, қазіргі «Жетісу» клубының бас бапкері Самат Смақов ASnews.kz сайтына берген сұхбатында Чемпиондар лигасындағы «Интер» мен «Қайрат» арасындағы ойынға қатысты пікірін білдірді.

«Әрине, «Қайратқа» оңай болмайтыны түсінікті. «Интер» – еуропалық футболдың гранд клубы. «Сан-Сиро» жанкүйерге толы болады, ондай атмосферада ойнау оңай емес – трибуналардың қысымы, ойыншылардың деңгейі өте жоғары. Бірақ біздің команда үшін ең бастысы – мінез көрсету. Клуб үшін, өзің үшін, жанкүйер үшін күресу керек. Әрине, сәл сәттілік те қажет. Футболды сондықтан жақсы көреді – өйткені ол күтпеген нәтижелерге толы», – деді Смақов.

Чемпиондар лигасының топтық кезеңінің төртінші турындағы «Интер» – «Қайрат» матчы 5 қарашадан 6 қарашаға қараған түні Милан қаласындағы «Джузеппе Меацца» стадионында өтеді. Алматылықтар бұған дейін «Реал» (0:5), «Спортинг» (1:4) және «Пафоспен» (0:0) ойнап, бір ұпай еншілеген болатын.