«Пафостың» бас бапкері «Қайратты» «Ариспен» салыстырды

«Пафос» клубының бас бапкері Хуан Карлос Карседо «Қайратқа» қарсы ойын алдындағы баспасөз мәслихатында алматылықтарды Кипрдің командасымен салыстырды, деп хабарлайды ASnews.kz.

«Чемпиондар лигасындағы әрбір команда жоғары деңгейде ойнап жатыр. «Қайрат» та жақсы өнер көрсетуде, ертең біз ең жақсы футболымызды ойнағымыз келеді – онсыз жеңіске жете алмаймыз.

Мен оларды нақты кіммен салыстыру керектігін білмеймін, бірақ олар Кипрдегі «Ариске» ұқсайды деп ойлаймын. Олар агрессивті, шабуылға көп шығатын команда, бәлкім кейбір жағынан бізге де ұқсайтын шығар. Ертең «Қайратқа» қарағанда жақсы ойнауға тырысамыз», – деді Карседо.

Ертең, 21 қазанда Чемпиондар лигасының үшінші туры аясында Алматыдағы Орталық стадионда «Қайрат» – «Пафос» кездесуі өтеді.

Бір қызығы, Карседо айтқан Аристі бұған дейін «Қайраттың» бұрынғы бапкері Алексей Шпилевский жаттықтырған.