Уразбахтин – Алонсо туралы: өзімді оның жанкүйерімін деп айта аламын

«Қайраттың» бас бапкері Рафаэль Уразбахтин матч алдындағы баспасөз мәслихатында мадридтік «Реалдың» бапкері Хаби Алонсоның жұмысына тәнті екенін мойындады, деп хабарлайды ASNews.kz.

«Иә, маған Хаби Алонсо бапкер ретінде қатты ұнайды. Өзімді оның жанкүйерімін деп айта аламын. Ол заманауи маман, мен оның «Байердегі» жұмысына тәнті болдым. Ойындарын көріп, өзіме көп нәрсені түртіп алдым. Маған оның шабуылдағы ойыны, допты бақылау стилі ұнады. Қазір «Реалда» Мбаппе, Винисиус, Мастантуоно сияқты ойыншыларымен шабуылдағы әлеуеті одан да қатты жоғарылады. Ол әлі өз идеяларын толық жүзеге асырған жоқ – «Реалға» келгеніне небәрі алты ай болды емес пе? Алонсоға уақыт керек, бірақ қазірдің өзінде оның стилі айқын байқалады», – деді Уразбахтин.

«Қайрат» 30 қыркүйекте Чемпиондар лигасының екінші турында «Реалға» қарсы ойнайды. Кездесу Орталық стадионда өтеді және Астана уақытымен 21:45-те басталады.