Қожабергенов – «Спортинг» – «Қайрат» матчы жайлы: өз деңгейімізді Еуропамен салыстырып аламыз

Танымал қазақстандық жаттықтырушы әрі футбол сарапшысы Асқар Қожабергенов ASnews.kz тілшісіне берген сұхбатында «Қайраттың» алғаш рет Чемпиондар лигасына шығуы туралы пікір білдірді.

«Әрине, біздің алматылықтардың Чемпиондар лигасының жалпы кезеңіне өткені – тек «Қайрат» үшін емес, бүкіл Қазақстан футболы үшін өте маңызды жағдай. Бұл деген біздің Қазақстан футболының, «Қайраттың» жаңа деңгейге шыққанының дәлелі».

Оның айтуынша, алматылық клуб отандық футболдың бағытын және командалардың халықаралық аренадағы бәсекеге дайындығын тексеріп алуға мүмкіндік алды:

«Енді қазақ футболының қай бағытта дамып жатқанын, қандай жетістікке жететінін осы Еуропаның үлкен командаларымен ойнағанда тексеріп, салыстыратын боламыз. Әрине, бірінші турда мықты команда түсті. Бірақ футболда бәрі мүмкін. Мұны күні кеше әзірбайжандық «Карабах» «Бенфиканы» ұтып, дәлелдеді. Біздің «Карабахтан» кем ештеңеміз жоқ. «Бенфиканы» Португалияда ұтты, сол үшін біз де үлкен сенім артамыз «Қайратқа».

Сондай-ақ ол матч алдында «Қайраттың» біраз қиындықтарға тап болғанын атап өтті:

«Соңғы кезде «Қайраттың» негізгі қақпашыларының ауыр жарақат алғаны жағдайды қиындатып тұр. Өйткені қақпада 18 жасар жасөспірім тұратын болады. Бірақ қорғаушылар, Қалмұрзаға үлкен көмек көрсетеді деп ойлаймын. Сеніммен қараймыз осы ойынға».

Естеріңізге сала кетейік, «Қайрат» Чемпиондар лигасының топтық кезеңіндегі алғашқы ойынын 18-нен 19-на қараған түні Лиссабонда «Спортингке» қарсы өткізеді.

Бұған дейін «Жеңіс» клубының бұрынғы ойыншысы Жоао Оливейра осы матч туралы пікір білдірген еді.