Грузиялық футболшылар қазақстандықтарға қарсы жабылып төбелесті: видео

Грузияда өтіп жатқан «Batumi Cup» халықаралық турнирі аясында Қазақстанның 15 жасқа дейінгі жасөспірімдер құрамасы мен тбилисилік «Динамо» U-15 командасы арасындағы матч жаппай төбелеспен есте қалды, деп хабарлайды ASnews.kz.

Кобулети қаласындағы «Челе Арена» стадионында өткен кездесу барысында қос команда ойыншылары арасында үлкен жанжал шыққан. Оқиға ушыққан кезде ұйымдастырушылар матчтың тікелей трансляциясын тоқтатуға мәжбүр болды.

Белгілі болғандай, келеңсіз жағдайға грузиялық футболшылар мен жалпы Грузияның атына айтылған балағат сөздер түрткі болған. Сонымен қатар, жанжал барысында екі жақтың ойыншылары бір-біріне түрлі заттар лақтырып, жаппай қақтығыс орын алған.

Дегенмен, осындай ірі жанжалға қарамастан, ұйымдастырушылар кездесуді тоқтатпауға шешім қабылдады. Қазақстандық команда да турнирден шеттетілмей, жарысты жалғастыруға мүмкіндік алды.

Айта кетейік, отандық жасөспірімдер құрамасы бұл турнирде финалға дейін сәтті жетті. Алайда, шешуші ойында қазақстандықтар испаниялық «Вильярреал» U-15 командасымен кездесіп, 0:3 есебімен есе жіберді.