Сәтпаевтың командаласы Уэльс құрамасы бапкерінің «Бернлиге» тағайындалмай қалғанына өкініш білдірді

Англиялық «Бернли» мен Уэльс құрамасының қорғаушысы Коннор Робертс Крейг Белламиді клубтың бас бапкері қызметінен көргісі келгенін мойындады, деп хабарлайды ASnews.kz.

Маусым айының соңында валлийлік құраманың тәлімгері Скотт Паркердің ізбасары ретінде «Терф Мурға» оралуға жақын болған. «Бернли» басшылығы мен Уэльс футбол қауымдастығы өтемақы сомасын да келісіп қойғаны хабарланған еді, алайда соңғы сәтте келісім бұзылды. Нәтижесінде англиялық клуб «Генктің» бұрынғы тәлімгері Ники Хайенді таңдады.

Ұлттар лигасының матчтары қарсаңында Робертс BBC Sport Wales арнасына берген сұхбатында Венсан Компанидің бұрынғы көмекшісі командаға мінсіз үйлесетінін атап өтті:

«Мен Белламиді көптен бері білемін. Ол «Бернлиде» бапкер болып жұмыс істеді, ал қазір Уэльсті жаттықтырады. Адамдар сырттай не айтса да өз еркі, бірақ онымен және оның жұмыс әдістерімен таныс адамдар ол туралы тек мақтап айтады. Оның «Бернлидің» бапкері болмағанына көңілім қалды ма? Жоқ десем, өтірік айтқаным болар еді. Бұл керемет болар еді – бізге дәл осы кісі керек болған. Бірақ олай болмады, сондықтан біз алға жылжимыз. Ол әлі де құрамада бізбен бірге және команданы жақсарту үшін бар күшін салуда», – деді футболшы.

Еске сала кетейік, «Бернлидің» намысын 18 жастағы қазақстандық шабуылшы Дастан Сәтпаев қорғайды (қазіргі уақытта форвард жарақатынан айығып жатыр). Жаңа бапкер Ники Хайеннің жетекшілігімен клуб маусымды өте сәтсіз бастады және қазір Чемпионшиптің турнир кестесінің ең соңғы сатысында тұр.

Айта кетерлігі, Беллами мен Сәтпаев футбол алаңында бұған дейін де кездескен: 2025 жылдың наурызында Кардиффте Сәтпаев Қазақстан құрамасы сапында Уэльске қарсы матчта (1:3) дебют жасаған болатын. Кейінірек сол жылдың қыркүйегінде Астанада Қазақстан құрамасы тарихындағы ең жас дебютант әрі гол авторы ӘЧ-2026 іріктеу матчы аясында уэльстік маманның командасына қарсы негізгі құрамда ойнады (0:1).