«Жұмсақ әрі аңқау»: Сәтпаевсыз қалған «Бернлидің» бас бапкері ұятты жеңілістен кейін не деді?

Чемпионшиптің бесінші туры аясында ағылшындық «Бернли» өз алаңындағы «Терф Мур» стадионында «Бристоль Ситиге» 1:2 есебімен есе жіберді, деп хабарлайды ASnews.kz.

Алаң иелері ұзақ уақытқа созылған жеңісіз сериясын үзуге жақын еді: 56-минутта жартылай қорғаушы Аарон Рэмзи команданы алға шығарды. Алайда матчтың соңы қонақтардың еншісінде кетті. 82-минутта қорғаушы Роберт Дики таразы басын теңестірсе, ойынның қосымша уақытында қонақтардың шабуылшысы Юй Хиракава «Бристоль Ситиге» жеңіс әкелді.

Қазақстандық шабуылшы Дастан Сәтпаев бұл ойынның өтініміне енмеді. Естеріңізге сала кетейік, өткен турда «Мидлсброға» қарсы (1:1) өткен матчында 18 жастағы форвард негізгі құрамда шығып, ойынның үздік ойыншысы атанған болатын. Алайда 81-минутта ол санының артық бұлшықетін ұстап, алаңнан кеткен еді. Ағылшындық инсайдерлердің мәліметінше, қазақстандық футболшының сіңірі зақымданған болуы мүмкін.

Матчтан кейін «Бернлидің» бас бапкері Ники Хайен команданың психологиясы мен шешуші сәттердегі әрекетін қатаң сынға алды:

«Өте ауыр әрі өкінішті. Егер есепте 1:0 есебімен алда келе жатсаң, өмірің соған тігілгендей ойнауға тиіссің. Біз ұзақ уақыт бойы жеңіске жеткен жоқпыз, бірақ соңында тым жұмсақ, аңқау әрі стандарт кезінде қажетті тәртіпті көрсете алмадық. Жанкүйерлеріміздің көңілсіздігін түсінемін – олар жеңісті тым ұзақ күтуде. Бізге қорқуды тоқтатып, күресті жалғастыру қажет».

Бес турдың қорытындысы бойынша «Бернлидің» еншісінде екі ұпай ғана қалып, команда Чемпионшип жарыс кестесінің соңғы, 24-ші орынына түсіп қалды. Өз кезегінде, 10 ұпай жинаған «Бристоль Сити» 4-ші сатыға көтерілді.

«Бернли» келесі матчын осы сейсенбіде, 8 қыркүйекте өткізеді.