Қазақстандық футболшы Еуропада расизмге тап болғаны туралы айтып берді

Норвегиялық «Бродд» клубының 17 жастағы шабуылшысы Алдияр Омаров ASnews.kz басылымына берген сұхбатында Орталық Азия мен Скандинавиядағы өмірдің айырмашылықтарын бөлісіп, Еуропада тап болған нәсілшілдік жағдайлары туралы айтты.

«Олардың мәдениеті мен ойлау жүйесі біздікінен мүлдем өзгеше, бұл тіпті киім кию стилінен де байқалады. Мүлдем басқа түсініктер. Көшіп келгенімде аулаға ойынға шыққаным есімде. Норвегтер мен араб мигранттары тым агрессивті болды, содан олардың біреуіне: «Жүр, жеке шығайық?» дедім. Маған ауылдан келгендей қарады. Бұдан бөлек, халықтың басым бөлігі – әл-ауқаты жоғары адамдар, сол себепті кейде жоғарыдан төмен қарайды. Өздерін «жоғары нәсіл» санап, «арийлер» сияқты сезінетіндер сені «негр» немесе «қытай» деп айтуға дайын тұрады. Мені де осылай қорлаған сәттер болды», – деді Омаров.

«Астана» клубының түлегі Алдияр Омаров Норвегияға 2024 жылы қоныс аударған.

 Осы жазда вингер Данияда өткен халықаралық турнирге қатысып, U-17 және U-19 командалары сапында өткізген жеті матчта екі гол соғып, үш нәтижелі пас берді.

«Бродд» Норвегияның үшінші дивизионында өнер көрсетеді.