Екінші матч – екінші гол: Самат Смаковтың ұлы «Бешикташ» сапында тағы да гол соқты

Қазақстан жасөспірімдер құрамасының жартылай қорғаушысы Аламгир Смаков Түркия чемпионатында «Бешикташтың» жастар командасы (U-19) сапындағы сәтті ойынын жалғастыруда, деп хабарлайды ASnews.kz.

U19 PAF Ligi екінші турында стамбулдық клуб сырт алаңда «Аланьяспорды» 2:0 есебімен жеңді. 18 жастағы қазақстандық хавбек бастапқы құрамда алаңға шығып, кездесудің 17-минутында есеп ашты. Ал 73-минутта Улаш Имай Гюрбюз қонақтардың басымдылығын нығайта түсті.

Бұл жеңістің арқасында «Бешикташ» U-19 мүмкін болған 6 ұпайдан 6 ұпай жинап, жарыс кестесінің үшінші орнына жайғасты. Олар тек соққан және жіберген доптар айырмасы бойынша «Галатасарай» мен «Трабзонспорға» жол беріп тұр.

Аламгир Смаков үшін бұл гол «Бешикташ» U-19 сапындағы екі матчтағы екінші доп болды. Алғашқы турдағы дебюттік ойында да ол гол соғып, командасына «Эюпспорды» жеңуге (4:2) көмектескен еді.

Қазақстан футболының аңызы Самат Смаковтың ұлы түрік грандының академиялық секторына алматылық «Қайраттан» ауысты.

Аламгир Қазақстан U-19 құрамасында өнер көрсетеді. Еуропа чемпионатының іріктеуінде ол үш матч өткізіп, Грекия құрамасының қақпасына гол соққан болатын.