«Дәрігерлер әзірге рұқсат бермей отыр»: Черчесов Самородовтың «Ростовқа» қарсы матчқа неге қатыспайтынын түсіндірді

«Ахмат» клубының бас бапкері Станислав Черчесов Ресей Премьер-лигасының 5-туры аясында «Ростовқа» қарсы өтетін матч алдында Қазақстан құрамасының шабуылшысы Максим Самородовтың не себепті ойынға қатыспайтынын түсіндірді, деп хабарлайды ASnews.kz.

Черчесовтың айтуынша, қазақстандық футболшы балтыр бұлшықетінен жарақат алған және дәрігерлердің шешіміне байланысты матчты өткізіп алады.

«Біз өз мүмкіндіктерімізді көрсетіп, жеңіске жеткіміз келеді. «Ростовқа» қарсы ойындарымыз әрдайым қиын өтеді. Ең бастысы – жоспарлағанымыздың бәрін алаңда орындау. Ал Самородовқа келсек, оның балтыр бұлшықеті зақымданған. Дәрігерлер әзірге ойнауға болмайтынын айтып отыр», – деді Черчесов «Матч ТВ» арнасына берген сұхбатында.

Самородов «Ахматтың» бүгінгі өтініміне енген жоқ. Ал Қазақстан құрамасының тағы бір ойыншысы Ғалымжан Кенжебек өтінімде болғанымен, матчты қосалқы құрамда бастады.

Бұған дейін БАҚ-та Максим Самородовқа мәскеулік «Спартак» клубы қызығушылық танытып отырғаны хабарланған болатын.