Қазақстандық шабуылшы Испанияда гол соқты: Ла Лигада дебют жасауы мүмкін

Испаниялық «Атлетико Леванте» клубының 18 жастағы вингері Алдияр Нұрғали «Асероға» қарсы жолдастық кездесуде бой көрсетті, деп хабарлайды ASnews.kz.

Қапталдағы шабуылшы Испанияның бесінші дивизионының өкілі «Асероға» қарсы бақылау матчында 45 минут өнер көрсетті. Қарсылас қақпасын дәл көздеген қазақстандық «Левантенің» резервтік командасына сенімді жеңіске (2:0) жетуге көмектесті.

Еске сала кетейік, алдағы маусым Алдияр Нұрғали үшін U-23 баламасы саналатын «Атлетико Леванте» сапындағы алғашқы маусым болмақ. 2025 жылдың желтоқсанында Астана тумасы Ла Лига клубымен ұзақ мерзімді келісімшартқа отырған еді.

Егер вингер алдағы ойындарда нәтижелі өнер көрсетсе, негізгі команданың жаттығуларына шақырылуы мүмкін:

«Басшылық егер өзімді жақсы жағынан көрсете алсам, ересектер командасымен бірге жаттығуларға тартатынына уәде берді», – деген еді Нұрғали ASnews.kz басылымына берген сұхбатында.

Өткен маусымда Қазақстан жасөспірімдер құрамасының футболшысы «Леванте» U-19 сапында сегіз гол соғып, нәтижелі ойынымен көзге түсті.