«Yulduzlik kasali yo‘q»: qozog‘istonlik «Ulitau» to‘purari Husanov bilan do‘stligi haqida gapirib berdi

Qozog‘istonning jezqazg‘onning «Ulitau» klubi hujumchisi Baqdaulet Zulfiqarov ASnews.kz nashriga bergan eksklyuziv intervyusida faoliyatining Belarusdagi davrini yodga oldi va «Manchester Sitining» o‘zbekistonlik himoyachisi Abduqodir Husanov bilan qalin do‘stligi haqida aytib berdi.

Qozog‘istonlik forvardning so‘zlariga ko‘ra, ularning yo‘llari 2021-yilda Minskning «Energetik» klubida kesishgan. O‘shanda o‘zbekistonlik legioner xorij futbolidagi ilk qadamlarini endigina tashlayotgan edi.

«Abduqodir u paytda jamoada edi, lekin hali 18 yoshga to‘lmagani uchun, FIFA reglamentiga binoan klub uni rasman ro‘yxatdan o‘tkaza olmasdi. O‘sha paytda biz bir uyda yashardik, mashg‘ulotlarga birga borardik, ro‘zg‘orni birga tebratardik. U – mening yaqin do‘stim. Hayotda ham, ijtimoiy tarmoqlarda ham har doim bir-birimizni qo‘llab-quvvatlaymiz, hol-ahvol so‘rab turamiz. Men uning ota-onasi bilan yaxshi tanishman. Ha, hozir uning bo‘sh vaqti kam. Xudo xohlasa, vaqti bo‘lib, uyiga – Toshkentga qaytganida, do‘stlar bilan yig‘ilib, vaqtni birga o‘tkazamiz», – deb bo‘lishdi Zulfiqorov.

Husanovning futbol maydonidan tashqarida qanday inson ekanligi haqidagi savolga javob berarkan, qozog‘istonlik futbolchi uning juda kamtarin ekanligini ta’kidladi:

«U juda mehribon va ochiqko‘ngil inson. Unda umuman yulduzlik kasali yo‘q. Oddiy muhitdan chiqqan oddiy yigit. U haqida yana ko‘plab yaxshi gaplarni aytish mumkin».

Eslatib o‘tamiz, 25 yoshli Baqdaulet Zulfiqarov joriy mavsum o‘rtalarida «Ulitau» tarkibiga kelib qo‘shildi. Jezqazg‘on klubi safida 12 ta o‘yinda maydonga tushgan hujumchi beshta gol va bitta golli uzatmaga mualliflik qilishga ulgurdi.

Abduqodir Husanovga kelsak, o‘zbekistonlik himoyachining faoliyati «Energetik-BGU»dan keyin tezkor o‘sishga erishdi. 2023-yilning yozida u Fransiyaning «Lans» klubiga o‘tgan bo‘lsa, 2025-yilning yanvar oyida 40 million yevro evaziga Angliya grandi «Manchester Siti»ga shov-shuvli transferni amalga oshirdi.

Joriy mavsumda himoyachi «shaharliklar» safida barcha turnirlarda oltita o‘yin o‘tkazdi. APL grandi tarkibida Husanov Angliya kubogi va Angliya liga kubogi sohibiga aylanib ulgurdi (ikkala sovrin ham 2026-yilda qo‘lga kiritilgan).