Қазақстан футзал қауымдастығы 90 миллион теңге қарызын әлі жаппады: салдарынан трансляция тоқтап қалуы мүмкін

Қазақстан футзал қауымдастығы чемпионат матчтарының трансляциясын ұйымдастыру бойынша қызмет көрсететін компания алдындағы қарызын әлі төлемеді, деп хабарлайды ASnews.kz.

Соңғы бірнеше айда қауымдастықтың әлгі компания алдында 89 991 000 теңге көлемінде берешегі жиналған.

Өз кезегінде Қазақстан футзал қауымдастығының президенті Нұрсұлтан Құрман қол қойған ресми хатта Ақылбек Досжановқа бұл қарыз ағымдағы жылдың 10 сәуіріне дейін толық өтелетініне кепілдік берген.

Алайда, 11 сәуірдегі жағдай бойынша, қызмет көрсеткен мамандар тиесілі төлемдерін әлі алмаған. Көптеген видеооператорлар мен режиссерлер үшін Қазақстан чемпионаты матчтарын түсіру негізгі табыс көзі болып саналады.

Бейресми мәліметтерге сүйенсек, төлемдердің кешігуі салдарынан жағдай сотқа дейін баруы мүмкін, сондай-ақ футзал қауымдастығы ұйымдастыратын турнирлердің трансляцияларының тоқтап қалу қаупі бар.