«Арыс» клубының иесі: «Ақтөбені» таңғалдырамыз – сенсация күтіңіздер

«Арыс» клубының иесі Арман Пирманов ASnews.kz сайтына берген сұхбатында Қазақстан кубогы аясындағы матчта «Ақтөбеге» оңай болмайтынын айтты.

«Бүгін ешқандай тосын нәтиже болған жоқ – фаворит командалар жеңіске жетті. Ал ертең, Құдай қаласа, «Арыс» сенсация жасайды», – деді жас функционер.

9 сәуір күні түркістандық команда өз алаңында «Ақтөбені» қабылдайды. Турнир регламенті бойынша бір мезетте он легионерді алаңға шығаруға рұқсат етілгендіктен, «қызыл-ақтардың» құрамында Луиш Нани ойнауы мүмкін.

Алғашқы ойын күнінде «Тобол» «Аңсатты» 8:0 есебімен ойсырата жеңсе, «Қайрат» «Жайықтан» 3:1 есебімен басым түсті, ал «Астана» қосымша уақытта «BKS» командасын 2:1 есебімен жеңіп кетті.