Қазақстан футзал қауымдастығының ТВ-компания алдында 90 миллион теңге қарызы бар

ASnews.kz редакциясына Қазақстан футзал қауымдастығына чемпионат матчтарының трансляциясын ұйымдастыру бойынша қызмет көрсететін компания өкілдері жүгінді.

Соңғы бірнеше айда қауымдастықтың әлгі компания алдында 89 991 000 теңге көлемінде берешегі жиналған. Өз кезегінде Қазақстан футзал қауымдастығының президенті Нұрсұлтан Құрман қол қойған ресми хатта Ақылбек Досжановқа бұл қарыз ағымдағы жылдың 10 сәуіріне дейін толық өтелетініне кепілдік берген.

Бейресми мәліметтерге сүйенсек, төлемдердің әрі қарай кешіктірілуі қауымдастық ұйымдастыратын турнирлердің трансляциясына кері әсер етіп, тіпті тоқтап қалуы да мүмкін.

Айта кетейік, бұған дейін бірінші және екінші лига матчтарының трансляциясын талапқа сай ұйымдастырмағаны үшін InHockey компаниясы футбол жанкүйерлері тарапынан сынға ұшыраған еді.