«Әртүрлі ойнаймыз»: Еркін Тапалов Қазақстан құрамасындағы Джон ван ’т Схиптің тактикасы туралы айтты

Қазақстан ұлттық құрамасының қорғаушысы Еркін Тапалов Словакияға қарсы ойын алдындағы баспасөз мәслихатында бас бапкер Джон ван ’т Схиптің командаға қандай ойын философиясы мен тактикасын қойып жатқаны туралы сұраққа жауап берді, деп хабарлайды ASnews.kz.

«Бапкердің өзі жауап бермесе, мұндай сұраққа мен жауап бере алмаймын. Әр командаға қарсы әртүрлі тактика қолданамыз, қарсыласқа қарай бейімделеміз деп айта аламын. Бізде біртұтас философия болды деп айта алмаймын – әр қарсыласпен әртүрлі ойнаймыз», – деді футболшы.

Еске сала кетейік, 13 қарашада Қазақстан құрамасы Ұлттар лигасының бесінші турында сырт алаңда Молдовадан 1:2 есебімен ұтылып, екі ұпаймен C3 тобында мерзімінен бұрын соңғы, төртінші орынға табан тіреді. Джон ван ’т Схип шәкірттері турнирдің осы маусымындағы қорытынды матчын 16 қарашада «Астана Арена» стадионында төрттік көшбасшысы – Словакия құрамасына қарсы өткізеді. Кездесу Астана уақытымен сағат 20:00-де басталады.