Самородов дисквалификацияға байланысты Словакияға қарсы ойынға қатыспайды

Грозныйлық «Ахмат» пен Қазақстан ұлттық құрамасының шабуылшысы Максим Самородов шеттетілуіне байланысты Словакияға қарсы өтетін алдағы өз алаңымыздағы матчқа қатыса алмайды, деп хабарлайды ASnews.kz.

Ұлттар лигасының бесінші туры аясында Молдова құрамасына қарсы өткен сырт алаңдағы кездесу аяқталғаннан соң Самородов бас төреші Андреа Коломбодан сары қағаз алды. Одан кейін италиялық арбитрмен артық сөзге келіп қалған шабуылшы бірден екінші ескертуін алып, арты қызыл қағазға ұласты.

Еске сала кетейік, Кишиневтегі матч қазақстандықтардың 1:2 есебімен жеңілуімен аяқталған еді. Қонақтар сапынан жалғыз голдың авторы самаралық «Крылья Советов» клубының шабуылшысы Ислам Чесноков атанды.

Джон ван’т Схип шәкірттері келесі кездесуін 16 қараша күні өткізеді. Олардың қарсыласы топ көшбасшысы – Словакия құрамасы болмақ, ал ойын елордадағы «Астана Арена» стадионында өтеді.