Фарердың бас бапкері – Қазақстанға қарсы ойын туралы: жеңіс не тең ойынға көнеміз

Фарер аралдары құрамасының бас бапкері Эйдун Клакстейн матч алдындағы баспасөз мәслихатында Қазақстанға қарсы өтетін Ұлттар лигасының ойынынан күтетін үміттерімен бөлісіп, тығыз күнтізбе мен команда көшбасшысының жоқтығына пікір білдірді, деп хабарлайды ASnews.kz.

Ойынға дайындық және физикалық жағдай туралы

«Ертең біз осы терезедегі соңғы, төртінші ойынымызды өткіземіз. Барлығы көп еңбектенді, бұл әрқайсысымыз үшін ауыр кезең болды. Қазақстан да, Фарер аралдары да алдыңғы үш матчта жеңіске жете алмады, сондықтан қос команда да бұл кезеңді жеңіспен аяқтауға ұмтылады. Қазақстанның мықты команда екенін білеміз, олар өз алаңында ойнайды. Қиын матч күтіп тұр, бірақ өзімізге сенеміз. Қысқа уақыт ішіндегі үш ойыннан кейін физикалық және психологиялық дайындық алдыңғы орынға шығады. Бізге энергия, тәртіп, батылдық және креатив қажет. Ойынның тағдырын ұсақ-түйектер, аздаған сәттілік немесе ықтимал қателіктер шешуі мүмкін. Біз жақсы дайындалдық: егер Қазақстан үш орталық қорғаушымен ойнап, жоғарыдан прессинг жасаса, біз бұған дайын боламыз».

Менталитет пен ауыр күнтізбе туралы

«Соңғы жылдары біз футболды дәстүріміз бен мәдениетімізбен байланыстыра алдық. Басты қағидамыз: ешқашан берілмеу және талмай еңбектену. Алаңдағы жағдай қандай болса да, ұйымшылдықты сақтау маңызды. Оған қоса, біздің футболшылар шетелде жоғары деңгейде өнер көрсетеді және ұлттық құрама үшін ойнауға әрдайым құштар.

Ұшуларға келетін болсақ, бұл өте көп күшті талап ететін кезең — 11 күн ішінде төрт ойын. Үздіксіз әрлі-берлі сапарлар. Ұлттар лигасындағы ең қиын күнтізбе бізде. Бірақ біз сылтау іздемеуге тырысамыз, керісінше шешімдер тауып, ойынға назар аударамыз. Қазақстанмен өткен бірінші матчта біз жеңіске лайық едік, бірақ үш ұпай (үш тең ойын үшін) — бұл да жаман емес. Ертең тең түссек те, топтағы мүмкіндігіміз сақталады, алайда біздің мақсатымыз – жеңіске жету».

Қазақстанның жаңа бапкері мен құрамдағы шығындар туралы

«Жаңа бапкері бар командаларға қарсы ойнау тәжірибеміз бар: өткен күзде Черногориямен, енді Қазақстанмен солай болды. Бірінші матчта олардың тактикасы бұрынғыға ұқсас болды, бірақ кейбір жаңа тактикалық жүрістер байқалды, басында біз оған дайын болмадық. Ұлттық құрамадағы жұмыс уақытты қажет етеді. Ертең бапкер міндетті түрде бірдеңені өзгертуге тырысатыны анық, оның не болатынын көру маған да қызық.

Словакияға гол соққан шабуылшымыз Адриан Юстинуссен Қазақстанға келе алмады. Біз онсыз ойнаймыз, бірақ оны алмастыра алатын ойыншыларымыз бар. Жалпы шаршау аясында матч тағдырын шынымен де бір қателік немесе бір ойыншының жеке шеберлігі шешуі мүмкін. Бізде эпизодты өз пайдамызға шеше алатын футболшылар бар, мысалы, Йоханнес Бьярталид».

Еске сала кетейік, Қазақстан мен Фарер аралдары құрамалары арасындағы УЕФА Ұлттар лигасының матчы 6 қазанда Астанада өтеді. Қазіргі таңда қос команда да турнирдің осы терезесінде бірде-бір жеңіске жеткен жоқ.

Ван ’т Схип – Фарерге қарсы ойын туралы: жауапкершілікті өз мойныма аламын, ел үшін күресеміз