Каспийде қаза тапқандарды еске алу: Фарер аралдары—Қазақстан матчы бір минуттық үнсіздікпен басталды

Торсхавнда өтіп жатқан Ұлттар лигасының бірінші туры аясындағы Фарер аралдары мен Қазақстан құрамалары арасындағы матч бір минуттық үнсіздікпен басталды. Командалар мен стадиондағы жанкүйерлер Каспийде қайғылы жағдайда қаза тапқан қазақстандық әскери қызметшілерді еске алды, деп хабарлайды ASnews.kz.

Еске сала кетейік, 24 қыркүйекте ҚР Қорғаныс министрлігі Маңғыстау облысындағы «Каспий қорғанысы-2026» оқу-жаттығуы кезінде болған төтенше жағдай туралы хабарлаған еді. Каспий теңізінің жағалауында ауа райының күрт бұзылуына және қатты дауылға байланысты әскери теңізшілерді су ағызып әкеткен.

Қайғылы оқиға салдарынан 12 адам қаза тапты. Үш әскери қызметшіні аман алып қалу мүмкін болды, олардың бірі қазір ауруханада жатыр. Жоғалып кеткен тағы екі адамды іздестіру-құтқару жұмыстары жалғасуда. Әскерилердің қаза табуына байланысты Қазақстан Президенті Қасым-Жомарт Тоқаев 25 қыркүйекті Жалпыұлттық аза тұту күні деп жариялады.

Бұған дейін матч алдындағы баспасөз мәслихатында ұлттық құраманың бас бапкері Джон ван 'т Схип пен команда капитаны Бауыржан Исламхан да қаза тапқандардың отбасыларына және бүкіл Қазақстан халқына қайғыра көңіл айтқан болатын.