«Салайдын мен Жақсылық Қазақстан құрамасына лайық»: ҚПЛ легионері «Қайсар» ойыншылары жайлы

Қызылордалық «Қайсардың» словакиялық қақпашысы Адам Ковач ASnews.kz сайтына берген сұхбатында өз командаластары – қақпашы Нұрымжан Салайдын мен вингер Нұрәлі Жақсылықтың өнер көрсетуі туралы пікір білдіріп, олардың ұлттық құрамаға шақырылу мүмкіндігін бағалады.

– «Қайсардағы» әріптесіңіз, қақпашы Нұрымжан Салайдын шынымен де тамаша маусым өткізіп жатыр. Ол ұлттық құрамаға шақыртуға лайық деп ойлайсыз ба?

– Нұрымжан шынымен де жақсы маусым өткізуде және команданы бірнеше рет құтқарып қалды. Ол, әсіресе маусымның басында, шақыртуға лайық болды деп санаймын. Бірақ мен бапкерлердің шешімін талқылай алмаймын, өйткені қазақстандық қақпашылар арасында бәсекелестік өте жоғары. Біздің қақпашыларымыз арасындағы қарым-қатынасымыз тамаша. Біз бәріміз бірге жұмыс істейміз, күн сайын бір-бірімізді ынталандырамыз және арамызда өте жақсы атмосфера орнаған.

– Ал Нұрәлі Жақсылық туралы не айтасыз? Виктор Мозес оның тіпті Англияда да ойнай алатынын айтқан еді.

– Мен үшін Нұралы – ғажап, дарынды ойыншы. Егер ол осылай еңбек етуін жалғастыра берсе, мансабында керемет биіктерге жетіп, ұлттық құрама жейдесін де кие алатынына сенімдімін. Сондықтан бұл мәселеде Виктормен келісемін.

Еске сала кетейік, «Қайсардың» 30 жастағы капитаны әрі қақпашысы Нұрымжан Салайдын биылғы ҚПЛ маусымында 21 матч өткізіп, төрт ойында қақпасын «құрғақ» сақтап, 28 гол жіберіп алды (қайтарылған соққылар көрсеткіші – 76%). Қақпашы жалпы сейвтер саны бойынша (80 сейв) лигада екінші орында тұр. Сондай-ақ оның еншісінде қайтарылған екі пенальти және қақпадан сәтті шыққан 39 (41-дің ішінен) әрекет бар.

21 жастағы вингер Нұрәлі Жақсылық шілде айында «Астанадан» жалға алу құқығымен «Қайсарға» ауысты. Қызылордалық клуб сапында ол толық емес 11 матч (алаңда 682 минут) өткізіп, үш гол соқты. Футболшыға құқық елордалық клубқа тиесілі, онымен келісімшарт осы жылдың соңында аяқталады. Ойыншыға түркиялық «Қайсеріспор» нақты қызығушылық танытып отыр.

«Словакияның жеңісін күтемін»: «Қайсар» қақпашысы – Қазақстанға қарсы ойын жайлы