Кройфтан тәлім алып, «Аяксты» құтқарған: Нидерландылық сарапшы Қазақстан құрамасының жанкүйерлеріне үндеу жасады

Қазақстандық футбол жұртшылығы Джон ван ’т Схиптің келуін күмәнмен қарсы алды. 62 жастағы бапкердің соңғы нәтижелері шынымен де таңғалдырмайды: екі жыл ішінде Грекияны бірде-бір ірі турнирге шығара алмады, ал кейіннен Армения футбол федерациясы оны қызметінен босатты.

Дегенмен, беделді Algemeen Dagblad басылымының шолушысы Йохан Инан ASnews.kz-ке берген сұхбатында голландиялық бапкерді ерте бағалауға болмайтынын айтты.

Кройф туралы әңгімелер өтірік емес

«Ван ’т Схип – жақсы бапкер. Мен ол бапкерлік еткен екі ұжымда – «Зволле» мен «Аякста» бірге жұмыс істеп үлгердім. Бұл баяғыда болған оқиға, бірақ оның ойыншылармен тез тіл табысатынын әрдайым байқайтынмын. Оның үлкен тәжірибесі бар, оның ішінде өмірлік тәжірибесі де мол.

Ол – шабуылдаушы футболды жақтайтын Кройф мектебінің өкілі. Жоғарыда аталған клубтарда бас бапкердің міндетін атқарушы болып жүріп, Джон осы стильді айтарлықтай дәрежеде сіңіре білді», – деді сарапшы.

Елдің ең танымал клубын қайта тірілтті ме?

«Ол кезде «Аякс» терең дағдарысты бастан кешіріп жатқан. Команда тіпті турнирлік кестенің соңғы орнына дейін құлдырады. Ван ’т Схип ұжымды клуб үшін де, өзі үшін де өте қиын сәтте қабылдап алып, оны жоғары көтере білді.

Амстердамда нәтижелердің жақсаруы арқасында қайтадан тыныштық орнап, болашаққа көз тіккен қайта құру жұмыстарын бастауға мүмкіндік туды».

Факт: Еуропаның бұрынғы чемпионы бұл қызметті жұбайы қайтыс болғаннан кейін бірнеше аптадан соң қабылдады. Сұхбаттарының бірінде ол бұл тағайындауды жарына арнағанын мойындады: «Әйелім «Аяксқа» оралғанымды қалаған еді. Біздің махаббатымыз осы жерден басталған».

Заманауи әрі озық маман

«Қазір объективті баға беру қиын. Иә, Джон жасармай жатыр, бірақ «Зволле» мен «Аякста» ол ескі көзқарастағы бапкер болған жоқ. Ал «Мельбурн Ситиде» мүлдем City Football Group құрылымына кірді.

Әрине, Ван ’т Схипті «ноутбукпен жүретін бапкерлердің» немесе профессорлардың жаңа буынына жатқызуға болмайды, бірақ Нидерландыда ол шабуылға белсенді қосылатын қаптал қорғаушылары мен үш орталық қорғаушыдан тұратын схеманы қолданды. Көптеген қарсыластар бұл тактикаға қарсы дәнеңе істей алмады», – деп қосты ол.

Джон ван ’т Схиппен келісімшартқа жақын күндері өтетін ҚФФ атқарушы комитетінің отырысынан кейін қол қойылады. Қыркүйекте Қазақстан Ұлттар лигасының топтық кезеңін бастап, Словакия, Фарер аралдары және Молдоваға қарсы ойнайды.

Нидерландылық маманның штабына Нұрбол Жұмасқалиев, Елдос Ахметов (екеуі де – ассистенттер), Юрий Новиков (қақпашылар бапкері), Вадим Боровский (дене дайындығы жөніндегі бапкер) және Тимур Құсайынов (аналитик) кіреді.

ҚФФ уәжі: федерация Ван ’т Схипті тағайындар алдында не нәрсеге сүйенді