Ербол Қайыров: келісілген матчтармен күрес жел диірменіне қарсы шыққанмен бірдей

Журналист әрі комментатор Ербол Қайыров Қазақстан футболындағы келісілген матчтар туралы пікір білдірді, деп хабарлайды BorodAbata.kz (AS News).

«Келісілген матчтармен күрес жел диірменіне қарсы шыққанмен бірдей. Қазақстан футболының басты сценаристінің кім екенін бәрі біледі, алайда оны шеттете алмай отыр. Тіпті оны федерацияға жұмысқа шақырады.

Күмән туғызатын матчтарды тізіп өтейін: биылғы «Қызылжар» – «Тұран» және «Астана» – «Оқжетпес», 2024 жылы «Астана» – «Атырау», 2022 жылы «Ордабасы» – «Ақтөбе», 2022 жылы Қазақстан кубогының финалындағы «Ордабасы» – «Ақжайық» және тағы басқалар.

Омаров пен Лория! Қазақ футболын тазартуға шамаларыңыз жете ме?» – деді Қайыров.

Ербол Қайыров бұған дейін ҚФФ басшыларының жұмысына қатысты мәселені көтеріп, бас хатшы Давид Лория мен федерация президенті Марат Омаровты сынаған болатын. Оның айтуынша, қазақстандық футболға деген сенімнің төмендеуіне солардың әрекеті (және әрекетсіздігі) себепші болып отыр.