Ндиайе өзіне жасалған шабуыл туралы: қолдарында суық қару болса да, жарақат алмадым

«Тобылдың» франциялық қорғаушысы Пап-Альюн Ндиайе Қостанайда орын алған оқиғаға қатысты пікір білдіріп, өзінің аман-есен екенін растады, деп хабарлайды ASnews.kz.

«Әлхамдулиллаһ, жағдайым жақсы. Олардың қолында суық қару болса да, Дәуреннің (клуб жұмысшысы – еск.) мызғымас қолдауының арқасында еш жарақат алмадым. Кейін жағдайды бақылауға алған Қостанай полициясына да алғысымды білдіремін», – деді футболшы.

Бұған дейін ASnews.kz Қостанайда африкалық тегі бар еуропалық футболшыға шабуыл жасалғанын хабарлаған болатын.

Кейіннен өзге БАҚ өкілдері оқиғаның жаңа егжей-тегжейін бөлісіп, зардап шеккен легионердің «Тобылдың» француздық қорғаушысы Пап-Альюн Ндиайе екенін жазды.

БАҚ мәліметінше, оқиға 1 қараша күні Қайырбеков көшесіндегі үйлердің бірінің кіреберісінде орын алған. Футболшы мен жарысқа келген 2007 жылғы екі жасөспірім арасында сөз келіспеушілігі туындап, соңғылары спортшыға пышақпен қоқан-лошқы көрсеткен. Бақытқа орай, футболшы дене жарақатын алған жоқ. Тәртіп бұзған екі азаматқа қатысты ҚР ӘҚБтК-нің 434-бабы (ұсақ бұзақылық) бойынша әкімшілік хаттама толтырылды.