«Ордабасы» ойыншысын алаңнан қуу керек еді»: «Ақтөбенің» экс-легионері төрешілікке қайран қалды

«Ақтөбе» мен Панама ұлттық құрамасының бұрынғы шабуылшысы Фредди Гондола ASnews.kz тілшісіне берген сұхбатында «Ордабасыға» (1:3) қарсы матчтағы төрешілікке қатысты даулы жағдайға пікір білдірді.

«Ордабасы» қорғаушысының (Сергей Малый – еск.) өз айып алаңында жасаған әрекеті қызыл қағазға сұранып тұр. Чемпион атану үшін «Ақтөбе» менімен келісімшартты қайта жасасуы керек», – деді 31 жастағы футболшы.

Айта кетейік, ҚПЛ-дың 23-турындағы кейінге шегерілген матчтың 86-минутында Сергей Малый Даниэль Сосаға қарай иығымен әдейі соққы жасаған болатын. Бұған дейін рефери Антон Кучма доп «қолға тиді» деген себеппен «Ақтөбе» шабуылшысының голын да есепке алмай тастаған еді.

Фредди Гондола «ақ-қызылдар» сапында 2024-2025 жылдары өнер көрсетті. Ол 19 ойынға қатысып, үш гол соқты және бір нәтижелі пас берді. Бүгінгі таңда сальвадорлық «Интер» клубының намысын қорғайды.

«Ақтөбе» осымен де мақтана алады»: «Ордабасы» легионері жанжалды ойыннан кейін мәлімдеме жасады