«Чемпиондыққа үміт үзілмейді»: Марк Гуаль «Жетісуға» соққан голы мен Конференциялар лигасы туралы

Алматылық «Қайраттың» шабуылшысы Марк Гуаль ASnews.kz сайтына берген сұхбатында талдықорғандық «Жетісуды» (1:0) жеңген матч туралы пікір білдіріп, ұзақ үзілістің әсерін бағалады және Конференциялар лигасынан не күтетінін айтты.

– Марк, матчтан және соққан голыңыздан қандай әсер алдыңыз?

– Жеңіске жеткенімізге және гол соққаныма қуаныштымын. Бұл мен үшін де өте маңызды. Бірақ, иә, «Жетісу» қорғанысқа жатып алды, бос кеңістік мүлдем аз болды. Командалар осылай жабылып алған кезде ойнау қиын. Соншама ойыншының арасынан өту оңай емес. Мұндай матчтарда ойнау ауыр. Сен допқа иелік етесің, оны бір қапталдан екінші қапталға бересің, бірақ шептер арасынан пас өткізе алмайсың. Менің ойымша, басты қиындық осында болды.

– Қазір команданың эмоциялық күйі қандай? Екі жеңіліс болды, содан кейін ұзақ үзіліс, қайта оралу қиынға соққан шығар…

– Бұл ұзақ үзіліс болды – матчты көп күтуге тура келді. Әдетте біз әр 3-4 күн сайын ойнаймыз. Оңай болған жоқ. Бірақ бұл жаттығу жасауға, психологиялық тұрғыдан қалпына келуге, бұрын болған сәтсіздіктерді ұмытып, келесі ойындарға назар аударуға жақсы уақыт болды. Енді біз жеңіске жеттік, тек келесі матч туралы ойлаймыз. Қайтадан 3-4 күн сайын ойнайтын қалыпты кестемізге ораламыз. Тек алға жылжимыз.

– Команда чемпиондық атақты жеңіп алатынына әлі де сене ме?

– Мүмкіндік бар кезде – үміт те үзілмейді. Біз күресуді жалғастырамыз. Әрине, бізге тек өз ойындарымызға назар аудару қажет. Ары қарай не боларын көреміз.

– Ал Конференциялар лигасы ше? Команда алдына қандай мақсат қойды, мысалы, плей-оффқа шығу міндеті бар ма?

– Бұл мүлдем басқа турнир әрі ол жақта өте қиын болады. Біз әр матчқа жеке дайындалып, қадам-қадаммен жылжуымыз керек. Бірінші ойыннан кейін Конференциялар лигасына қалай енгеніміз белгілі болады, содан кейін алға қарай әрекет етеміз.

Еске салайық, ҚПЛ-дың 28-турындағы матчта алматылық «Қайрат» өз алаңында «Жетісуды» минималды есеппен жеңді. Кездесу тағдыры 86-минутта Марк Гуаль соққан жалғыз голдың арқасында шешілді. Бұл жеңістен кейін алматылық клуб 60 ұпай жинап, көшбасшы шымкенттік «Ордабасыдан» небәрі бір ұпайға қалып келеді (шымкенттік команда еншісінде бір ойын бар). Рафаэль Уразбахтиннің шәкірттері келесі ойынын 15 қазан күні УЕФА Конференциялар лигасының жалпы кезеңі аясында сырт алаңда латвиялық «Ригаға» қарсы өткізеді.

Уразбахтин «Жетісуды» жеңген ойын туралы: чемпион атануға мүмкіндік әрқашан бар