Уразбахтин «Жетісуды» жеңгеннен кейін ЧЛ мен ҚПЛ-ды салыстырды: эмоция бұрынғыдай емес

Алматылық «Қайраттың» бас бапкері Рафаэль Уразбахтин ASnews.kz сайтына берген сұхбатында талдықорғандық «Жетісуға» қарсы өткен ауыр жеңісті матчты (1:0) қорытындылап, үш апталық халықаралық үзілістің команда жағдайына әсерін бағалады және алдағы тығыз күнтізбеге дайындық туралы айтып берді.

– Біз үшін өте маңызды үш ұпай, өте маңызды жеңіс. Алдыңғы екі жеңілісті ескерсек, жеңісті серияға шығу қажет болды. Ойынға байсалды дайындалдық, қарсыластың жаралы аңдай екенін түсіндік. Турнирлік кестенің соңында тұрғандықтан, олар бізден ұпай алу үшін барын салды. Матч дәл осылай өтеді деп күттік: қарсылас қорғанысқа жатып, қарым-та шабуылдар мен стандартты жағдайлардан бақ іздейді деп ойладық. Олардың ішкі мәселелерін ескерсек, оңай болмайтынын білдік. Солай болды да. Біз негізінен жоспарлаған дүниемізді жасадық, бірақ бәрі бірдей ойдағыдай шыға бермеді.

Жағдайды қиындатқан нәрсе – біз бірге бар-жоғы бір ғана жаттығу өткіздік. Көптеген жігіттер құрамадан әртүрлі уақытта және әртүрлі жағдайда оралды. Біреуі көбірек ойнады, біреуі азырақ, ал біреулері жай ғана турист болып барып қайтты. Қиындықтар болды, бірақ ең бастысы – бәрі дені сау болып оралды. Қазір бізде күрделі, өте тығыз кезең: ойындар екі-үш күн сайын қатарынан өтеді. Әрбір футболшы алтынмен тең. Бұл ойында ешкімді қатардан жоғалтпағанымыз маңызды. Жарақат алған ойыншыларымыз қатарға тезірек қосылады деп үміттенеміз. Жеңіске қуаныштымыз және ары қарай жылжимыз: енді бізді Ригаға сапар, содан кейін чемпионаттың үш матчы күтіп тұр. Ол ойындарда барынша көп ұпай жинауға тырысамыз.

– Қатарынан екі жеңілістен кейін құрамалардың матчтарына берілген ұзақ үзіліс командаға зиянын тигізді ме, әлде пайдасына жарады ма?

– Шынымды айтсам, жеңілістен кейін ұзақ үзіліске кету эмоциялық тұрғыдан өте қиын. Әдетте жеңілген кезде, қатені тезірек түзету үшін келесі матчты асыға күтесің. Ал мұнда үш апта күтуге тура келді. Эмоциялық фон тиісті деңгейде болған жоқ. Бірақ жігіттер жарайды, үзілісті жақсы өткізді және бүгін біз қажетті нәтижеге қол жеткіздік.

Екінші жағынан алып қарасақ, тығыз кестеден кейін бұл үзіліс бізге физикалық тұрғыдан пайдалы болды. Команда демалды, қалпына келді, ойыншылар жарақаттарын емдеді. Дегенмен бірқатар футболшылар әлі де лазаретте жатыр.

– Чемпион атануға әлі де мүмкіндік бар деп ойлайсыз ба?

– Мүмкіндік әрқашан бар. Біз үшін тек өз ойынымызды қадағалап, қалған матчтарда барынша көп ұпай жинау маңызды.

– Былтыр қазан айында «Қайрат» «Жетісуды» 5:0 есебімен тас-талқан етті. Ал биылғы бұл жеңіс өте ауыр болды...

– Мотивация жоғалды деп ойламаймын. Мәселе эмоциялық фонда болып тұр. Үзіліс кезінде біз алты-сегіз адам болып жаттықтық, қалғандары ұлттық және жастар құрамаларына кетті. Үш апта болмаған кезде ойын тонусы мен байланыстар жоғалады, бұл түсінікті жағдай. Қажетті арнаға қайта түсу маңызды. Қазір матчтар легі басталады, біз бәрін ретке келтіреміз. Былтырғы «Жетісуды» жеңген ойынмен (5:0) салыстырсақ, ол кезде біз Чемпиондар лигасында ойнадық, эмоция тасып тұрды. Әрине, қазіргі фон одан нашарлау. Бірақ бүгін тек жеңіске жету өте маңызды болды.

Еске салайық, ҚПЛ-дың 28-турындағы матчта алматылық «Қайрат» өз алаңында «Жетісуды» минималды есеппен жеңді. Кездесу тағдыры 86-минутта Марк Гуаль соққан жалғыз голдың арқасында шешілді. Бұл жеңістен кейін алматылық клуб 60 ұпай жинап, көшбасшы шымкенттік «Ордабасыдан» небәрі бір ұпайға қалып келеді (оңтүстік командасының еншісінде бір ойын бар). Ал «Жетісу» 23 ұпаймен турнирлік кестенің соңғы сатысында тұр.