«Аспандағы айға ұмтылмаймыз»: Шох «Шахтердің» ҚПЛ-ға оралуы, Турловтың рөлі мен мақсаттары туралы

«Шахтер» футбол клубы директорлар кеңесінің төрағасы Рохус Шох команданың премьер-лигаға мерзімінен бұрын жолдама алуы, Freedom холдингіне жекешелендірілуі және жаңа маусымға дайындық саясаты туралы кеңінен айтып берді, деп хабарлайды ASnews.kz.

ҚПЛ-ға оралу және Кеншілер күні

«Шахтердің» элиталық дивизионға қайта оралуы Қарағанды үшін маңызды мереке – Кеншілер күнімен тұспа-түс келді. Рохус Шох бұл сәйкестікті клубтың қайта жаңғыру жолындағы маңызды қадамы деп бағалады:

«Андрей Финонченко бастаған бапкерлік штабқа және барлық футболшыларға алға қойылған мақсатты орындағаны үшін алғыс айтқым келеді. Сондай-ақ маусымаралық кезеңде команданы басқарып, жігіттерді оқу-жаттығу жиындарында физикалық тұрғыдан өте жақсы дайындаған Дмитрий Огайдың да еңбегін ерекше атап өту керек. Дегенмен, біз бірінші лигадағы бәсекелестік соншалықты жоғары болмағанын түсінеміз. Премьер-лигада мүлдем басқа деңгейдегі сынақтар күтіп тұр», – деді Шох.

Клубтың жекешелендірілуі және Тимур Турловтың рөлі

Клуб жетекшісі «Шахтердің» дамуындағы ең басты шешім – облыс әкімдігінен «Freedom» холдингіне жекешелендіріліп, Тимур Турловтың меншігіне өтуі болғанын атап өтті:

«Бұл орайда жекешелендіру процесіне қолдау көрсеткен және әлі де инфрақұрылым бойынша көмектесіп келе жатқан Қарағанды облысының әкімі Ермағанбет Бөлекпаевқа алғыс айтамыз. Ал Тимур Турловтың қосқан үлесін бағалау мүмкін емес. Әңгіме тек қаржыда емес – негізгі команданың бюджеті 2025 жылғы деңгейде қалды, ал барлық қосымша инвестиция академияға, инфрақұрылымға және мамандарды тартуға бағытталды. Мысалы, біз жаңа әрі заманауи офиске көштік. Тимур Русланович – болашаққа серпінмен қарайтын визионер. Ол клубты бір сәттік жоба ретінде емес, ұзақ мерзімді перспективада дамытуды көздейді».

Скаутинг қызметі және трансферлік жоспар

«Шахтер» ҚПЛ-ге дайындықты көктемде бастап кеткен. Клуб құрамында селекциялық-аналитикалық департамент құрылып, оны Владислав Хрущак басқарды. Сондай-ақ бұл қызметке жақында мансабын аяқтаған экс-футболшы Михаил Габышев тартылды:

«Михаил Габышев жаңа саладағы алғашқы қадамдарын жасап жатқанымен, үлкен пайда әкелуде. Ол Қазақстан нарығын өте жақсы біледі, көптеген футболшылармен, оның ішінде ұлттық құрама ойыншыларымен жеке таныс.

Біз, ең алдымен, еркін агенттерге және келісімшартты бұзу мүмкіндігі бар футболшыларға назар аударамыз. Қазақстандық сапалы ойыншылардың тапшылығын түсінеміз, бірақ жалақы жарысына қатысу ойымызда жоқ. Сонымен қатар биыл өзін жақсы көрсеткен жастарымызға да сенім артамыз. Аспандағы айға ұмтылмай, мүмкіндігімізді шынайы бағалаймыз».

Академия мен инфрақұрылым

«Толыққанды академиямыз қазір салынып жатыр, бірақ жасөспірімдерге қазірдің өзінде лайықты жағдай жасалды. Жас футболшылардың нәтижесі жақсарып, елдің түкпір-түкпірінен бізге келуге ұмтылатындар көбейді. Бұл бағытта Қарағанды облыстық футбол ассоциациясымен де тығыз жұмыс істеп жатырмыз», – деп түйіндеді Рохус Шох.

«Шахтёр» бірінші лиганың 20 турынан кейін 55 ұпай жинап, маусымның аяқталуына алты тур қалғанда премьер-лиғаға шығу мәселесін шешті. Қарағандылықтар екінші орында келе жатқан «Қайрат-Жастар» ұжымынан алты ұпайға озып кетті (алматылық фарм-клуб регламент бойынша элитаға көтеріле алмайды), ал қалған командалар үшін қолжетімсіз арақашықтыққа ұзады.