Андрей Мартин «Жетісуды» ойсырата жеңгеннен кейін «Ордабасының» чемпиондық жарыстағы мүмкіндігін бағалады

Шымкенттік «Ордабасының» бас бапкері Андрей Мартин Қазақстан премьер-лигасының 21-туры аясында талдықорғандық «Жетісуға» қарсы өткен сырттағы матчты (4:0) қорытындылады, деп хабарлайды ASnews.kz.

«Чемпионат соңына жақындап қалды, бүгінгісін қосқанда он тур қалды. Әрбір матчтың психологиялық жағынан да, жарыс кестесіндегі орны тұрғысынан да маңызы зор. Біз кіммен ойнайтынымызға қарамаймыз – бәрін құрметтейміз, бірақ бізге нәтижеге қол жеткізу керек.

Команданың бұл сырттағы ойынға дайындығына қуаныштымын. Күрделі матч күткен едік. Қарсылас ыңғайсыз, егер дұрыс бағаламасаң немесе ойынға дұрыс бапталып шықпасаң, қиындық тудыруы мүмкін. Ойыншылардың бар күшін салып, тәртіпті ойын көрсеткеніне қуаныштымын. Бұл кезеңдегі жеңіс өте маңызды. Басшылықты, ойыншыларды, бүкіл қаланы және әрдайым командамен бірге болатын жанкүйерлерді құттықтаймын», – деді Мартин.

«Жетісуды» жеңу «Ордабасыға» 49 ұпай жинауға және екінші орында келе жатқан алматылық «Қайраттан» алшақтықты төрт ұпайға арттырып, ҚПЛ жарыс кестесінің көш басында нығаюға мүмкіндік берді. Шымкенттіктер сапында Эльхан Астанов, Сұлтанбек Астанов, Лео Натель және Эвертон мергендік танытты.