Миллионер Артықбаев «Ақтөбе» басшылығымен кездесті: толық мәлімет

«Qazaq Stroy» құрылыс компаниясының басшысы және «Ақтөбе» клубының қожайыны Нұрлан Артықбаев клуб басшылығымен кездесу өткізді, деп хабарлайды ASnews.kz.

Жиын қорытындысы бойынша спорттық директор Марат Хайруллинмен, сондай-ақ команданың бас бапкері Штефан Тарковичпен әрі қарай да жұмысты жалғастыру туралы шешім қабылданды.

Словакиялық маманның қызметіндегі орны тұрақты болып қалмақ, алайда оның позициясы өзі сұратқан шетелдік футболшылармен толыққаннан кейін қайта қаралады.

Айта кетейік, молдовалық «Шерифтің» экс-директоры Важа Тархнишвилидің бұдан былай ақтөбелік клубқа ешқандай қатысы жоқ. Ресми ақпарат бойынша, мамыр айында бұл грузиндік маман заңды түрде қызметінен кетпеген Хайруллиннің орнына келуі тиіс еді.

Еске сала кетейік, ҚПЛ-дың 13 турының қорытындысы бойынша «ақ-қызылдар» турнирлік кестеде жетінші сатыда келеді. Ал ел Кубогындағы жорығы ширек финалда «Алтайдан» жеңілумен аяқталды (1:1, пенальти бойынша – 3:4).