Италияда ойнаған экс-футболшы – «Оқжетпестің» пенальтиі туралы: «Ертіс» қақпашысы ереже бұзған жоқ

Мәскеулік «Локомотив» клубы мен Ресей құрамасының бұрынғы қақпашысы Руслан Нигматуллин ASnews.kz сайтына берген сұхбатында «Оқжетпеске» қарсы матчта (1:2) «Ертіс» қақпасына белгіленген екінші пенальтидің қаншалықты дұрыс қойылғанын бағалады.

«Бұл – қақпашының айып алаңынан шығып, сенімді ойнаған сәті. Соңғы кезде енгізілген кейбір ережелермен келіспеймін. Пенальти эпизодында шабуылшының өзі байланыс іздегендей болды. Қақпашы айқайлап, допқа секіргенде, әдетте басқалары жол береді – бұл бұрыннан қалыптасқан нәрсе.

Бұл тартыста Ботнарь допқа қарсыласынан бұрын жетіп, басымдықпен әрекет етті, өйткені ол қолымен ойнай алады. Қақпашыларға зардабын тигізетін жаңа ережелерге сәлем айтамын! Голкиперлердің қолдарын байлап, қақпаны екі есе үлкейтуді ұсынар едім – сонда гол көп болады», – деді Нигматуллин.

Қазақстан Премьер-лигасының бесінші турында алдымен көкшетаулықтар Данила Нечаевтың фолынан кейін пенальти орындап, есеп ашты. Кейін Виталий Ботнарьмен болған эпизодтан соң тағы бір пенальти белгіленді. Екі жағдайда да бас төреші Денис Тевяшов VAR жүйесіне жүгінді. Осылайша, «Ертіс» маусымдағы алғашқы жеңілісіне ұшырады.

Руслан Нигматуллин – Италияның А сериясында ойнаған танымал ресейлік қақпашы. Ол «Верона» мен «Салернитана» клубтарында өнер көрсеткен, сондай-ақ 2002 жылғы әлем чемпионатына қатысқан.