Уразбахтин – Садыбеков туралы: арамызда ешқандай мәселе жоқ – оған сенім артамыз

«Қайрат» клубының бас бапкері Рафаэль Уразбахтин ASnews.kz сайтына берген сұхбатында Қазақстан құрамасына үміткер жартылай қорғаушы Әділет Садыбековтың ойынына баға берді.

«Садыбековтың деңгейін жақсы білеміз. Бұған дейін оның позициясында басқа ойыншы ойнады, сондықтан оған көп уақыт берілмеді. Қазір Әділет жаттығуда өзін өте жақсы көрсетіп жүр. Бапкерлер штабы оған негізгі құрамнан орын берді, ол сенімді ақтап келеді. Бізде ешқандай мәселе жоқ», – деді Уразбахтин.

23 жастағы жартылай қорғаушы КПЛ-дың алғашқы үш турында «Алтай» (1:0), «Ақтөбе» (1:0) және «Жетісу» (0:0) клубтарына қарсы матчтарды өткізіп алды. Алайда «Астана» (4:0) және «Тобыл» (1:1) секілді мықты қарсыластарға қарсы ойындарда негізгі құрамда алаңға шықты.

Бұған дейін ол ойын тәжірибесін арттыру үшін басқа клубқа ауысуы мүмкін деген ақпарат тараған еді.