Жұмасқалиев – «Тобылдың» шабуылдағы әлеуеті жайлы: Чесноков жоқ, енді қолда бар ойыншыларға сенім артамыз

«Тобылдың» бас бапкері Нурбол Жұмасқалиев «Қайратпен» болған ойыннан (1:1) кейін ASnews.kz сайтына берген сұхбатында команданың шабуылдағы мүмкіндігіне баға берді.

Чесноковтың жоқтығы туралы

«Жазда жаңа вингер аламыз ба, жоқ па – оны айтуға әлі ерте. Әрине, Ислам үлкен қадам жасады, қазір Шотландияда ойнап жүр. Бірақ болары болды, енді командадағы ойыншыларға сенім артамыз», – деді 44 жастағы маман.

Бапкерлік штаб венесуэлалық ойыншыға сенім артып отыр

«Луис (Герра) жаман ойнаған жоқ, бірақ бұдан да жақсырақ өнер көрсете алады. Ол әлі біздің чемпионатқа, жергілікті жағдайларға бейімделіп жатыр. Сондықтан әр ойын сайын біртіндеп қарқынын арттыруы керек».

Жұмат – Марат жұбы неге нәтиже көрсете алмай жүр?

«Бұл тактика мен ротацияға байланысты. Оның үстіне, «Тобылдың» шабуыл шебінде бәсекелестік жоғары: жаттығуда кім жақсы көрінсе, сол негізгі құрамда шығады», – деді Жұмасқалиев.

Қазақстан Премьер-лигасының бесінші турында қостанайлықтар «Қайратпен» тең ойнап, маусымдағы екінші ұпайына ие болды. Голдарды Урош Милованович пен Дастан Сәтпаев соқты.

Маусым басталар алдында «Тобыл» сапына Дамир Марат, Даурен Жұмат және Луис Герра сынды вингерлер қосылған. 29 жастағы венесуэлалық ойыншы жеті матчта үш гол соғып, бір нәтижелі пас берді.