ҚФФ: «Елімай» ҚПЛ-ға қоғамдық қор ретінде тіркелді

«Елімай» футбол клубы Қазақстан футбол федерациясының (ҚФФ) ресми жарыстарына қоғамдық қор ретінде қатысуға өтінім берді, деп хабарлайды ASnews.kz.

Семейлік клубтың қазіргі заңды мәртебесіне қатысты редакция ҚФФ-ға 18 наурызда сауал жолдаған болатын.

«Елімай» футбол клубы» қоғамдық қоры 2022 жылдың 19 шілдесінде Семей қаласының ҚР Әділет органдарында ресми тіркелген, 2026 жылғы маусымдағы Премьер-лига клубтары арасындағы Қазақстан Республикасының Чемпионатына қатысуға өтініш берді, лицензиялау рәсімінен өтіп, лицензия алды», – деп мәлімдеді федерация 2026 жылғы 18 наурыздағы №77/23 шығыс хатында.

ASnews.kz редакциясы 17 наурызда «Елімай» футбол клубына да сауал жолдаған еді, алайда клубтан жауап келмеді.

Естеріңізге сала кетейік, өткен жылдың тамыз айында «Елімай» клубтың коммерциялық емес акционерлік қоғам (КЕАҚ) мәртебесінде ресми тіркелгені туралы хабарлаған болатын. Соған қарамастан, клубтың ресми сайтында «Елімай» қоғамдық қор ретінде көрсетілген.