«Қайсар» жаңа спорт директорын тағайындады: ол кезінде төрешіні сатып алмақ болды деп айыпталған еді

Қызылордалық «Қайсар» клубының жаңа спорт директоры болып команданың бұрынғы футболшысы Талғат Сыздықов тағайындалды, деп хабарлайды ASnews.kz.

Директор болып небәрі бірнеше ай жұмыс істеген Алдан Балтаев жақында ғана қызметінен кеткен еді.

Талғат Сыздықов бұған дейін «Қайсар» клубының құрылымында түрлі қызметтер атқарған. Атап айтқанда, спорт директоры, футбол орталығының жетекшісі, сондай-ақ «Байқоңыр» футбол клубының жаттықтырушысы болған. Ол «Қайсардың» негізгі құрамында 16 маусым бойы өнер көрсетті.

2010 жылдың мамыр айында Қазақстан футбол федерациясының Бақылау-тәртіптік комитеті оны төрешіге пара бермек болды деген күдікпен футболға қатысты кез келген қызметпен айналысуға 36 айға тыйым салған. Кейін, 2011 жылдың сәуірінде бұл жаза мерзімі қысқартылып, дисквалификация мерзімі 2011 жылдың 31 қазанына дейін белгіленді.