«Қайсар» жалақы бойынша қарызын жаппаған: футболшылар мен бапкерлер сотқа жүгінбек

«Қайсар» футбол клубының ойыншылар, бапкерлер және қызметкерлер алдындағы жалақы бойынша қарызы шамамен 160 миллион теңгені құрайды, деп хабарлайды ASnews.kz.

Клубтың жаңа басшылығы бұл қарызды өтеуден бас тартып отыр. Соның салдарынан шамамен 100 қызметкер сот органдарына және Халықаралық футбол федерациясына (ФИФА) шағымдануды жоспарлап отыр. Олардың қатарында команданың бұрынғы және қазіргі ойыншылары да бар.

Сонымен қатар «Қайсардың» қызмет көрсетуші ұйымдар алдында берешегі бар екен. Бұл қарыздың жалпы көлемі шамамен 114 миллион теңгені құрайды.

Футбол орталығының бапкерлеріне келсек, олар өткен жылдың соңында мәжбүрлі түрде мерзімсіз демалысқа жіберілген. Қайтадан штатқа қабылдау 2 ақпаннан бастап жүзеге асырылмақ.

Қызылордалық клуб жуырда қымбат легионер – бұрын «Челси» мен «Ливерпуль» клубтарында ойнаған Виктор Мозесті қатарына қосты. Сондай-ақ команда жаңа маусымға дайындық аясында Біріккен Араб Әмірліктерінде оқу-жаттығу жиындарын өткізуде.