«Қызылжар» 10 миллион теңгелік қарызын жаба алмауда: компания ҚФФ президентіне өтініш жолдаған

«Қызылжар» футбол клубының «MIGHTY SOLUTIONS» (МАЙТИ СОЛЮШИНС) ЖШС алдындағы қарызы шамамен 10 миллион теңгені құрайды, деп хабарлайды ASnews.kz.

Портал редакциясына компанияның бас директоры Алма Хусаинова хабарласып, мынадай мәлімдеме жасады:

«2013 жылдан бері біз «Қызыл-Жар СК» футбол клубына қызмет көрсетіп келеміз. Ел аумағы бойынша команданы қонақүйге орналастыру, тамақтандыру және тасымалдау қызметтерімен қамтамасыз еттік. Осы жылдар ішінде көрсетілген қызметтердің барлығы клуб тарапынан ешқандай ескертусіз толық көлемде қабылданып отырды.

Қазіргі уақытта клуб Қостанай мен Астана қалаларында команданың тұруы мен тамақтануына байланысты көрсетілген қызметтер үшін «MIGHTY SOLUTIONS» ЖШС алдындағы 9 852 420 теңге көлеміндегі қарызын төлемеген.

Сотқа дейінгі тәртіппен біз қарызды растау туралы ресми хат және барлық растайтын құжаттары қоса тіркелген талап-арыз хатын жолдадық.

Аталған екі хатқа да «Қызылжар» футбол клубының бұрынғы басшылығынан (Николай Панин) ресми жауап алынды. Онда олар ішкі қаржылық аудиттің қорытындысына сүйене отырып, көрсетілген қызметтерді растаудан және қарызды төлеуден бас тартатынын хабарлаған.

Сонымен қатар «MIGHTY SOLUTIONS» ЖШС қазіргі «Қызылжар» клубының басшылығына да ресми хат жолдаған. Алайда бас менеджер Әлішер Апсалямов тарапынан нақты жауап алынбады.

Айта кету керек, заңды тұлғаның ауысуы, қайта ұйымдастыру немесе қарызды формалды түрде мойындамау – нақты көрсетілген қызметтер үшін туындаған міндеттемелерді орындаудан босатпайды және оларды төлеу міндетін жоймайды.

Қазақстан футбол федерациясының (ҚФФ) мүшесі болып табылатын және ресми жарыстарға қатысатын «Қызыл-Жар» футбол клубы Федерация субъектісі ретінде тиісті құқықтар мен міндеттерге ие, оның ішінде контрагенттер алдындағы шарттық міндеттемелерді орындау жауапкершілігі де бар, – деді Хусаинова.

Оның айтуынша, бұл мәселе бойынша Қазақстан футбол федерациясының Дауларды шешу палатасына да жүгінген, алайда елімізде футболға жауап беретін орган бұл іске көмектесе алмаған.

Осы себепті компания басшысы ҚФФ президенті Марат Омаровқа ашық хат жолдауға мәжбүр болған. Төменде ҚФФ-на жолданған өтініштің суреттері берілген.

Қазіргі уақытта Қазақстан футбол федерациясынан ресми жауап түскен жоқ.