Дмитрий Огай: «Қайрат» ұйымдасқан түрде ойнаса, «Селтиктен» де өте алады

ҚПЛ клубтарының бұрынғы жаттықтырушысы Дмитрий Огай BorodAbata.kz сайтына берген сұхбатында «Қайрат» жақсылап дайындалып, дұрыс көңіл-күймен шықса, «Селтикті» жеңіп, Чемпиондар лигасының жалпы кезеңіне шығуға қабілетті екенін айтты.

«Мүмкін емес ештеңе жоқ. Рафаэль Уразбахтиннің жаттықтырушылар штабы алға қойылған міндеттерді тамаша орындауда. Дұрыс көзқарас пен тағы бір рет ұйымшылдығын көрсетсе, «Қайрат» «Селтикті» жеңе алады. Команданың жағдайы жақсы. Бұған дейін ойыншыларының жарақатына байланысты алматылық команданың ойыны жүрмеген болатын, команда жиі ұпай жоғалтты. Бірақ барлық ойыншылары алаңға оралған кезде, «Қайрат» өз деңгейіне қайта жетті.

«Ақтөбе» Праганың «Спартасын» жеңгенде бәрі қазақстандықтармен ойнап-ақ, мықты қарсыластарды жеңе аламыз деп айтты. Бірақ кешегі ойында «Қайрат» сапында Қазақстан футболының екі түлегі ғана өнер көрсетті — Дастан Сәтпаев пен Еркін Тапалов. Қазақстандықтардың Еуропада ойнауы әлі қиын. Екінші жағынан, «Қайрат» сапында жас қазақстандықтар мен мықты легионерлер бар. Командада болашағынан зор үміт күттіретін жігіттер жетерлік – сол Рамазан Бағдат пен Әділет Садыбековты айтуға болады. Осы баланстың арқасында командада жақсы атмосфера қалыптасқанына сенімдімін. «Қайраттың» келесі кезеңге шығуы кездейсоқ жағдай емес», – деді Огай.

«Қайрат» екі матчтың қорытындысы бойынша «Слован» командасын жеңгендіктен, Чемпиондар лигасының плей-офф кезеңінде шотландиялық «Селтикпен» кездеседі. Алғашқы ойын 20 тамыздан 21 тамызға қараған түні Глазгода, қарымта кездесу 2 тамызда Алматыда өтеді.