«Қорқынышсыз ойнады»: сарапшы – Арутюнянның «Қайратының» «Аталантаға» қарсы ойынын жоғары бағалады

Ресейлік футбол сарапшысы және «ВасЛюбит» YouTube-жобасының қатысушысы Левон Балаян ASnews.kz тілшісіне берген сұхбатында Конференция лигасы аясындағы «Аталантаға» қарсы матчтағы (1:1) «Қайраттың» өнеріне баға берді.

«Қайраттың» бұл матчта өзін қалай ұстағаны ұнады: ешқандай қорқыныш байқалмады және қарымта шабуылда жақсы ойнады. Әрине, допқа көбірек иелік еткен «Аталанта» жеңіске жақын болды – олар мүлдем нашар ойнаған жоқ. Соңғы бірнеше жылда Сарридің командаларында жиі кездесетіндей ойын өрнегін көрсетті.

Алаңға Де Кетеларе сияқты шеберлігі жоғарырақ ойыншылар шыға бастағанда, алаң иелері таразы басын теңестірді. Бәлкім, олар 2:1 есебімен жеңіске жетер ме еді, бірақ «Қайрат» батылдығының жемісін көрді», – деп атап өтті Балаян.

Сарапшының сөзінше, алматылықтар сапындағы ең жарқын ойыншы – 29 жастағы шабуылшы Эдмилсон:

«Пас беру техникасы мен алаңды көре білуі жағынан маған Эдмилсон қатты ұнады. Мүмкін, бразилиялықтың қатысуымен тағы бір-екі матчты көрер едім. Оның жас еместігі өкінішті, бірақ физикалық тұрғыдан – шымыр, жеңіл әрі икемді. Ал ең бастысы, ақымақ емес», – деп қосты ол.

Еске сала кетейік, Конференция лигасы жалпы кезеңінің үшінші турындағы «Аталанта» мен «Қайрат» арасындағы кездесу тең нәтижемен аяқталды. Марк Гуальдің голынан кейін италиялықтар сапынан Никола Крстович көзге түсті.

Айта кетейік, бұл матч Жора Арутюнян үшін еуропалық турнирлердегі дебют болды. Бұған дейін 34 жастағы маман ешқашан ересектердің кәсіби клубын басқарған емес.

Левон Балаян – италиялық А Сериясына маманданған сарапшы. Сондай-ақ ол футбол киносының продюсері әрі «Cappuccino&Catenaccio» YouTube-арнасының редакторы болып табылады.

Бұған дейін ҚПЛ-дың бір клубы Молдова ұлттық құрамасының ойыншысына қызығушылық танытып жатқаны белгілі болды.