«Құрамадан шақырту күтемін»: «Сабах» капитаны Покатилов – ЧЛ-ға шығуы мен ұлттық команда туралы

Әзербайжандық «Сабахтың» капитаны әрі Қазақстан құрамасының қақпашысы Стас Покатилов Tenbildop.kz сайтына берген сұхбатында команданың Чемпиондар лигасының жалпы кезеңіне тарихи шығуынан кейінгі әсерлерімен бөлісті.

«Сезімді сөзбен айтып жеткізе алмаймын, жай ғана сөзім жоқ. Өз арманымның, бәріміздің ортақ арманымыздың орындалғанына әлі де сене алар емеспін. Тіпті не айтарымды да білмеймін. Қарсылас ретінде кімді көргім келеді? Шынымды айтсам, әртүрлі кезеңдерде әртүрлі армандадық, бірақ қазір кез келген қарсыласпен кездесуге қуаныштымын – бұл Чемпиондар лигасының жалпы кезеңі ғой.

Үзілісте бапкер не айтты дейсіз бе? Есеп ойын басталғанға дейінгідей сақталды. Гол соғып, жеңіске жету керек болды, сондықтан біз өз ойынымызды әрі қарай жалғастырғымыз келді. Қазір киім ауыстыратын бөлмеде нағыз хаос болып жатыр, меніңше, бұл хаос әлі де жалғасады. Бәріміз жиналып, бұл жеңісті міндетті түрде атап өтеміз. Дайындалып, жеребе тартуды күтеміз. Біздің ертегіміз жалғасуда, рәсімді асыға күтеміз.

Ұлттық құрама ма? Мен кеңейтілген тізімге ендім, бапкерлермен сөйлестім. Әрқашан айтатынымдай: егер құрамаға шақырса, өте қуанышты боламын. Кез келген спортшы мен футболшы үшін ұлттық құрамада өнер көрсету – ең жоғарғы меже. Мен үшін де бұл ерекшелік емес, сондықтан құрамадан шақырту күтемін», – деді Покатилов.

Чемпиондар лигасы іріктеуінің плей-офф раундындағы қарымта кездесуде бакулік «Сабах» овертаймда израильдік «Хапоэльді» (Беэр-Шева) 5:2 есебімен жеңіп, керемет камбэк жасады (екі кездесудің жалпы есебі – 6:4).

Қазақстандық қақпашы капитандық таңбаны тағып шығып, тартысты ойында толық 120 минут өнер көрсетті. Бұл нәтиже «Сабахқа» өз тарихында алғаш рет Чемпиондар лигасының жалпы кезеңіне шығуға мүмкіндік берді.

Қақпашы Қазақстан ұлттық құрамасының Ұлттар лигасының күзгі матчтарында Фарер аралдары, Словакия және Молдоваға қарсы ойындарына кеңейтілген құрамына енді. Голкипер ұзақ үзілістен кейін алғаш рет елдің басты командасы сапында өнер көрсетуге мүмкіндік алып отыр.

«Реалмен» және «Барселонамен» ойнағым келеді»: «Сабахтың» өзбекстандық футболшысы – ЧЛ-ға шығуы туралы