«Арсеналға» гол соққан «Қайраттың» бұрынғы шабуылшысы «Левскиге» қарсы матчта фаворитті таңдай алмады

Болгариялық «Левски» мен алматылық «Қайраттың» бұрынғы бразилиялық шабуылшысы Рикардиньо Чемпиондар лигасының іріктеу кезеңі аясындағы бұрынғы клубтарының алдағы текетіресіне қатысты пікір білдірді, деп хабарлайды ASnews.kz Sportal.bg сайтына сілтеме жасап.

«Екі командаға да деген сезімім ерекше, бірақ «Левскидің» жүрегімдегі орны мүлдем бөлек. Менде «Қайратта» өнер көрсету мүмкіндігі болды, бұл көбіне «Левскидегі» табыстарымның арқасында жүзеге асты: онда өткізген уақытым маған жаңа мүмкіндіктер сыйлады. «Қайраттан» жақында ғана кеткендіктен, ол жақта достарым да көбірек, әрі команда құрамын да толық дерлік білемін. Мен кеткелі «Левскиде» де көп нәрсе өзгерді, бірақ клубпен және жанкүйерлермен арадағы байланысым әлі де өте тығыз. Біреуіне басымдық беру қиын, бірақ бізді тамаша матч күтіп тұрғанына сенімдімін. Қай команда жеңіске жетіп, Чемпиондар лигасында әрі қарай өтсе де, кез келген нәтижеге қуанамын», – деді Рикардиньо.

Екі ұжымның Софияда өткен алғашқы кездесуі португалиялық жартылай қорғаушы Сержиньюдің жалғыз голының арқасында «Левскидің» минималды жеңісімен (1:0) аяқталды. Қарымта ойын 11 тамыз күні «Түркістан Аренада» өтеді.

Болгариялық клубта бразилиялық шабуылшы негізгі құрамның тұрақты ойыншысы әрі шабуыл шебінің көшбасшысы болды. Ол 56 матчқа қатысып, 20 гол соқты және сегіз нәтижелі пас берді.

 Ал «Қайрат» сапында форвард ресми түрде 32 кездесуге қатысып, төрт гол мен екі ассистті өз есебіне жазды. Дегенмен, алаңға жиі шыққанына қарамастан, оның жалпы ойын уақыты бар-жоғы 808 минутты құрады – іс жүзінде ол алматылықтар сапында толық он матчқа да жетпейтін уақыт өткізді.

Алматы әуежайында «Қайрат» қақпашылары Анарбеков пен Қалмұрзаны 50 жанкүйер шығарып салды (видео)