Енді ақша сұрамайды: «Қайрат» «Левскиге» қарсы сырт алаңдағы матчты тегін көрсетеді

Алматылық «Қайрат» өз жанкүйерлері үшін жағымды шешім қабылдады: УЕФА Чемпиондар лигасының үшінші іріктеу кезеңі аясында софиялық «Левскиге» қарсы алғашқы матч ашық көрсетілімде таратылады, деп хабарлайды ASnews.kz.

Матчты қайдан тегін көруге болады

Қазақстандық футболсүйер қауым маңызды еурокубоктық бәсекені республикалық QAZSPORT телеарнасынан тікелей эфирде тамашалай алады.

Бұдан бөлек, клуб барлық тілек білдірушілер үшін ашық онлайн-трансляция ұйымдастырды – ойын Kairat TV ресми YouTube-арнасында мүлдем тегін қолжетімді болады.

Ақылы көрсетілімдерден бас тарту

Алматылықтардың еурокубоктық ойындарын көрсету форматы түбегейлі өзгергенін атап өткен жөн. Бұған дейін Чемпиондар лигасының алғашқы екі іріктеу кезеңіндегі черногориялық «Сутьеска» мен кипрлік «Омонияға» қарсы матчтар эксклюзивті шарттармен ақылы жазылым арқылы көрсетілген еді. Ойындар тек Freedom онлайн-кинотеатрында (Freedom SuperApp қосымшасы), сондай-ақ QAZSPORT телеарнасында тек кабельдік желі абоненттері үшін ғана қолжетімді болған.

«Левскимен» өтетін кездесу «Қайраттың» осы еурокубоктық маусымдағы барлық жанкүйерлер үшін ешқандай шектеусіз әрі жазылым сатып алусыз қолжетімді етуді ұйғарған алғашқы ойыны болмақ.

Чемпиондар лигасының үшінші іріктеу кезеңі аясындағы алғашқы матч 4 тамызда Софиядағы «Георги Аспарухов» стадионында өтеді. Қарымта ойын 11 тамызда Түркістанда өтеді.

«Левски»—«Қайрат»: Чемпиондар лигасының ойынына болжам мен бәс тігу